Maibilang a maysa kadagiti kadadakkelan a panangabak iti basketbol iti historia ti Asian Games ti napnuan-irteng a 70-60 a balligi ti Gilas Filipinas kontra iti Jordan itay Oktubre 6 iti Hangzhou, China.
Inruar ti Gilas ti nainsiriban a panagay-ayamda, agraman ti natibker a depensa iti maudi a paset tapno masipdutda ti naatap a balitok a medalia nga arapaap ti tunggal Filipino ngem saan a nayalat dagiti napalpalabas a PH Team.
Ngem daytoy a balligi ti makuna a kasasam-itan idinto a nabukel laeng ti Gilas Filipinas dua a lawas sakbay a mangrugi ti Asian Games.
Maibilang a bannuar iti Gilas Filipinas da Ange Kouame (14 puntos), Justin Browlee (20 puntos), Scottie Thompson (11) ken Chris Newsome (13) gapu iti nasged a panagay-ayamda a nangpennek iti pannakawaw ti pagilian iti dayaw iti basketbol.
Manipud Kadagiti Agdama a Kameng ti Bannawag: Dios ti Agngina!
Daytoy ti umuna a balitok ti Filipinas iti basketbol sipud idi nangabak iti umuna nga uppat a serye (1951, 1954, 1958, ken 1962), ken umuna a pannakairaman iti Finals sipud idi 1990.
Gambang a medalia ti naudi a nagun-od ti Filipinas idi 1998 iti Bangkok, Thailand, idinto nga inyalat ti China ti balitok. (Rey Virgilio Lachica/Manila Bulletin//Lito Hilidon/Bannawag.)
