Inyeg ni Annie Ramirez ti maikatlo a balitok a medalia ti Filipinas iti 19th Asian Games iti Hangzhou, China itay Oktubre 6 kalpasan nga inabakna ni Galina Duvanova ti Kazakhstan (2-0) iti Women's 57-kg Jiu Jitsu Finals.
Nupay kasla marigatan idi damo, kinuna ni Ramirez a paset daytoy ti estratehiana nga aggaraw iti maudi a kanito.
Iti maudi a 30-segundo, naggaraw ni Ramirez, a nakaalanna iti 2 a puntos, idinto a di pay nakapuntos ni Duvanova.
Sakbay daytoy, inatiw pay ni Ramirez dagiti dadduma pay a kasinnalisalna a da Le Thi Thuong ti Vietnam, Fiona Toh ti Singapore, ken ni Shamsa Alameri ti United Arab Emirates (UAE).
Manipud Kadagiti Agdama a Kameng ti Bannawag: Dios ti Agngina!
Iti panagballigi ni Ramirez, inyegna ti maikadua a balitok a medalia ti Jiu Jitsu team ti Filipinas. (Rey Virigilio Lachica/Manila Bulletin//Lito Hilidon/Bannawag.)
