Daniw ni AMADO I. YORO
Kantaak ti agsapa a kakuyog dagiti
Agpalangit a sallapingaw
Ti pul-oy, yegna ti iliw uray dagiti segga
A di mapakadaan: kinaganus wenno
Kinaagtutubo, agsublida iti yuyeng
Tti kapanagan ti Sta. Romana: lagip
Ti tudo, pinadam-egna ti kinelleng
Tapno mulaak iti bukel, bin-i
Dagiti kamalig ken sarusar iti kinapudno
Ti arbis, kuldingenna ti lagip
Ti naikupin koman a ladawan
Ti uggot nga agang-anges
Kas iti uggot ti panagdakkel
Dagiti sagibo ti kaputotan: nagan.
(Ti pagaw, bimmanesbes
Nagumok manen iti sanga
Ti areca palm tree
Napessaan idin ti piekna
Iti suli ti abong)
Nasarakak manen ti pusok
Iti mata ti kappia
Ti ayat
Iti sakruy ti daan a balay
Nagsinnippit ti singin a pagaw
Nagtinnarektekda: lailo ken dungngo.
Adda isasangpet dagiti binatog
Kapagayam iti law-ang ni ayat
Kaslada kalapati nga agdisso iti tawa
Nagammalda iti sabong ti pammateg
Kalanglangko ida iti dulang ni ayat
Maputarko manen daytoy a kanta-daniw.
Adtoy ti sabali a panagkasangay tapno
Pasungadek manen rimat kas sagut
Iti maysa nga agpang: panagyaman.
