Minandar ni Presidente Ferdinand Marcos Jr. ti Department of Agriculture (DA) itay Oktubre 8 nga usaren ti sobra a nakolektar para iti Rice Competitiveness Enhancement Fund (RCEF) tapno matulonganda dagiti mannalon.
Binilin ni Presidente Marcos dagiti opisial ti DA nga aramatenda ti ania man a surok iti PhP10-bilion a nakobrar ket mausar a mangipaay iti pagbilagan, makina, ken dadduma pay a kasapulan dagiti mannalon tapno mataginayon ti adu a maapitda.
Ti RCEF ket aggapu iti taripa a makobrar kadagiti agrikultural a produkto, ket agsubli daytoy a taripa kadagiti mannalon babaen ti tulong nga ipaay ti DA.
Segun iti Republic Act 11203 wenno ti Rice Tariffication Law (RTL), dagiti buis a makobrar manipud iti taripa ti bagas ket masapul a tinawen nga agbayad iti PhP10-bilion tapno mapondoan ti RCEF dagiti programa ken proyekto a mangpasayaat iti apit dagiti mannalon.
Manipud Kadagiti Agdama a Kameng ti Bannawag: Dios ti Agngina!
Iti kallabes, inaprobaran ni Presidente Marcos ti pannakairuar ti pondo a PhP12.7-bilion a tulong kadagiti 2.3-milion a mannalon, ket maikkanda iti PhP5,000 nga ayuda kas sagudayen ti Rice Farmers Financial Assistance (RFFA) a programa ti gobierno. (Betheena Unite/Manila Bulletin//Lito Hilidon/Bannawag)
