Nagpakdaar ti Department of Information and Communications Technology (DICT) iti publiko itay Oktubre 9 a saan a lukluktan ti ania man a file a naglaon iti datos ti PhilHealth (Philippine Health Insurance Corporation) a naapektaran ti ransomware attack.
Imballaag ni DICT Secretary Ivan John Uy ti panagridam ti publiko ta mabalin nga usaren dagiti hacker ti impormasion a kas appan tapno mastrekda ti kompiuter ti asino man a mang-klik wenno mangi-download iti file a naglaon iti datos ti PhilHealth, idinto a mabalin nga addan virus dagitoy.
Inyebkas ti DICT ti pannakaseknan daytoy ta naiwarasen ti datos ti PhilHealth babaen ti Telegram ken ti Dark web.
Patien ni Uy nga international hacker dagiti nangserrek iti sistema ti PhilHealth, ket kinunana a saan nga maitured ti lokal a hacker daytoy ta matiliwda ida.
TURISMO: Intayon Idiay Ayuyang Garden iti Pila, Siudad ti Laoag!
Inyebkas pay ni Uy ti pannakadismayana gapu ta adda dagiti agiwarwaras ken mangisaknap iti natakaw a datos ti PhilHealth a mangpadpadakkel iti parikut, imbes ketdi a tumulong. (Sonny Daanoy/Manila Bulletin//Lito Hilidon/Bannawag)
