Dua a Filipino ti nairaman a natay gapu iti panaggubat ti Israel ken Hamas, ngem awan pay ti detalye ti impormasion maipapan kadakuada agraman ti lugar a nakatayanda, segun iti Deparment of Foreign Affairs (DFA).
Iti paskilna iti X (Twitter), inyebkas ni DFA Secretary Enrique Manalo a kondenaren ti Filipinas ti pannakatay dagiti dua a Filipino agraman amin a kinaranggas ken terorismo a gapuanan ti panangraut ti Hamas iti Israel.
Kinuna ni Manalo a sisasagana ti Filipinas a makitinnulong kadagiti dadduma pay a pagilian tapno magun-od ti aglaylayon a pannakarisut ti riri, kas mayannatup iti UN Securtity Council Resolutions ken ti sapasap a prinsipio ti sangalubongan a linteg.
Maibatay iti kaudian a datos ti DFA, adda nasurok a 30,000 a Filipinos iti Israel, ken 137 iti Gaza.
Manipud Kadagiti Agdama a Kameng ti Bannawag: Dios ti Agngina!
Iti kaudian a pakaammo ti Philippine Embassy iti Tel Aviv itay Oktubre 11, adda 6 a Filipino ti mapukpukaw iti Israel. (Joyce Ann L. Rocamora/PNA//Lito Hilidon/Bannawag)
