Ni AMADO I. YORO
Ipapanaw ti Birgo
Daradara ti bulan
Pitak daytoy a paraiso
Nagmawmawen ti ayamuom
Natayakon dita barukong
Sangitakto latta
Ti ayat a naidasay
A naibuyog natnag a bulong
Ken dagiti naregreg a sabong
Subliakto latta
Ti lamina ti kalman
Dagiti nasam-it-nasaem a lagip
Dagiti pasugnod-pasidumri
Ay-ayatenka kunak latta
Uray dinakon mangngeg
Nasaem daytoy nga ipapanaw
Iti umel a panaginnadayo
5 a Daniw
Palubosannak-palubosankan
Ruk-tannak-ruk-atankan--nasarakamon
Ti sapsapulem--nasarakamon ti pusom--inkan
Kas iti nawayaway a payakpak
Ti puraw a kalapati iti tangatang
Ket no subliamto maminsan pay
'Toy taeng addanto lugarmo
Kadagiti imeng ti rabii; luaakto
Ti panagsublim; iti dua a kaipapanan
Isublim Kaniak ti Kalman
Diak maliklikan dagitoy:
alipaga ti iliw
ti segga
ti gagar.
Ammuem dagitoy, Ayatko: adda
uram a di masebseban ti nagbaetanta a taaw,
mabalinak pay met a kunaen: "ay-ayatenka!"
Dawatek dagitoy: isublim kaniak ti kalman,
dagiti bara ti ayat ti pammateg
[Ita la a napaneknekak manen a pasetnak pay la ta pusom].
Agkitatanto pay ngata?
[duapulo ket dua a tawenen ti naglabas]
Wen! Urayem nga agsubliak
ket pagraipenta ti ungto ti kalman.
Arig layap ti lagipko, simmalput
iti ulep iti langit iti tangatang
dinaliasatko law-ang 'ta kinataom: Sika!
Nagpintasen ti manglagip iti lipat
addaka manen kadagiti pikapik
ti sursuratmo kayatko ti agsubli
iti sabali a panagsubli.
Denggem: kas kenka; kenka kaniak
Ay-ayatenka met!
