Nupay imbatad ti resulta ti medico-legal a saan a ti pannakatungpa ti makaigapu iti panagebbal ken panagpadara ti utek ni Francis Jay Gumikib, yuli latta ti Antipolo Police ti kaso a child abuse maibusor iti maestra a nangtungpa iti estudiante ti Peńafrancia Elementary School in Antipolo City.
Kinuna ni Antipolo Police Chief Lt. Col. Ryan Manongdo a gapu iti panangaklon ti maestra a nakapsut laeng ti panangtungpana iti estudiantena, maibilang daytoy a panaglabsing iti Republic Act 7610 wenno ti Anti-Child Abuse Law.
Kinuna ni Elen Minggoy nga ina ni Gumikib, intarayna ti anakna iti ospital idi Septiembre 26 wenno innem nga aldaw kalpasan ti panangtungpa ti maestra, ket natay ti ubing itay Oktubre 2 kalpasan a na-comatose.
Iti pannakaeksamen iti bangkay ni Gumikib, naiparipirip a ti panagdara ken panagebbal ti utek ti impatay ti ubing.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Minggoy a dina ammo nga adda sakit ti anakna.
Napakaammuanen ti pamilia ni Gumikib iti resulta ti autopsia.
Kinuna ni Minggoy a dumawatda ti legal a kapanunotan manipud iti sekta ti relihionda no ania ti mabalinda nga aramiden itoy a kaso. (Nel Andrade/Manila Bulletin//Lito Hilidon/Bannawag)
