Kinompirmar ti Department of Foreign Affairs (DFA) ken ti Philippine Embassy iti Tel Aviv itay Oktubre 11 a dua a Filipino ti natay gapu iti panangraut ti grupo a Hamas iti kibbutz, maysa a komunidad dagiti Israeli nga asideg iti nagbedngan ti Israel ken Gaza.
Maysa kadagiti natay ti Filipina a kakaskasarna manipud iti Pangasinan nga agtawen iti 33 ket 6 a tawenen nga agtrabtrabaho kas caregiver iti Israel; idinto nga agtawen ti 42 ken addaan asawa a Filipino manipud iti Pampanga ti maysa pay a nairaman kadagiti napapatay iti Israel gapu iti riribuk.
Segun ken ni Department of Migrant Workers (DMW) Labor Attaché Rodolfo Gabasan, rinaut ti maysa a kameng ti Hamas ti siled ti caregiver a Filipina ken ti amo daytoy, sa pinaltoganna ida.
Innayon ni Gabasan a saan a nalawag no kasano a natay tay lalaki.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni DFA Undersecretary Eduardo Jose de Vega a saan a maibawag ti nagan dagiti natay a Filipino, kas kiddaw dagiti pamiliada.
Adda pay 3 a Filipino a mapukpukaw, agraman ti maysa a mapapati a nakautibo ti Hamas.
Maysa pay a Filipino ti maatap a napapatay, nupay komkompirmaren pay laeng dagiti opisial ti gobierno ti kinasiasino daytoy babaen ti DNA test.
Iti Gaza a tengngel dagiti Hamas, 70 a Filipino ti nagkiddaw a mayawiddan.
Kaaduan a Filipino idiay Gaza ket nakaasawa iti Palestine. Makastrek dagiti Filipino iti Filipinas ngem saan a masinunuo no mapalubosan dagiti Palestine a pumanaw iti Gaza. (Joseph Pedrajas/Manila Bulletin/Lito Hilidon/Bannawag)
