Agdadapon dagiti 225 nga indigenous people (IP) iti nangayed a Metropolitan Theater iti Arroceros, Ermita, Manila inton Oktubre 20 ken 21 kas panangrambak iti IP Month a maawagan iti 15th Dayaw 2023 nga addaan iti tema a "Buhay na Dunong: Pagkamalikhain at Kalikasan."
Iti komperensia ti prensa nga inwayat ti Philippine Information Agency (PIA) itay Oktubre 13, impakaammo ni Commissioner for Subcommission on Cultural Communities and Traditional Arts ti NCCA Reden Ulo a maangay ti panagdadapon dagiti 225 a grupo dagiti IP manipud iti amianan, sentro, ken abagatan a paset ti pagilian.
Maibatay iti Presidential Proclamation no. 1906 (s2009), tinawen a marambakan ti National Indigenous Peoples Month iti bulan ti Oktubre.
Ti National Center for Culture and Arts (NCCA) ti nangisayangkat ti naballigi a panangrambak iti Indigenous Peoples' Month manipud 2005 agingga 2008 iti Isabela ken Davao.
TURISMO: Intayon Idiay Ayuyang Garden iti Pila, Siudad ti Laoag!
Ita a tawen, maiparangarang dagiti nadumaduma a maris ti kultura ti katutubo a Filipino kas panangbigbig kadagiti cultural masters a mangsalsalaknib kadagiti kannawidan dagiti katutubo.
Maibasar iti listaan ti National Commission on Indigenous Culture (NCIP), adda 110 nga IP community iti entero a pagilian. Ngem imbatad ni Ulo nga iti listaan ti NCCA, adda 225 nga IP iti entero a pagilian.
Impakaammo ni NCCA Project Management Division Chief Mary Anne M. Luis a malaksid kadagiti konsierto ken sala, iparangarang pay dagiti kapipintasan a kannawidan ti tunggal katutubo a tribu.
Inawis ni Luis ti publiko a makipaset iti panangrambak iti Dayaw 2023 ta, kas kunana, katutubotayo amin iti Filipinas. (Lito P. Hilidon/Bannawag)
