Iwayat ti Department of Trade and Industry ti Rehion 3 (DTI-3) ti maika-25 a Likha ng Sentral Luzon Trade Fair inton Oktubre 25 agingga iti 29, iti Megatrade Hall B ti SM MegaMall.
Kinuna ni DTI-3 Development Division Chief Warren Patrick Serrano a makipaset ti 165 a Micro-Small-Medium-Enterprise (MSME) manipud iti probinsia ti Aurora, Bataan, Bulacan, Nueva Ecija, Pampanga, Tarlac, ken Zambales, ket itampokda dagiti produkto nga ipagpampannakkel ti rehion.
Iti komperensia ti prensa, imparang ni Serrano dagiti tallo a nagballigi a negosiante a natulongan ti DTI-3 a naggapu iti Bataan, Pampanga, ken Bulacan a nangibinglay kadagiti padasda a nagnegosio.
Naiparang ni Edelyn Sitchon-Cañero nga akinkukua iti Edelyn's Homemade Nuts iti Pampanga nga addaan kadagiti produkto a mani, kasoy, ken garlic chips. Napadayawan ni Sitchon iti Go Negosyo Inspiring Filipina Entrepreneur Award.
TURISMO: Intayon Idiay Ayuyang Garden iti Pila, Siudad ti Laoag!
Manipud iti Bulacan, naiparang met ni Reymundo Dela Cruz a nangbuangay iti Ideas Koncept nga agar-aramid kadagiti nadumaduma a pangdekorasion iti balay a kas iti masetera, lampshades, pagarkos iti diding, kdp. Naggapu iti aglawlawna dagiti pinagaramidna kadagiti partuatna a kas iti semento, water hyacinth, abaka, kawayan, ken niog. Dati a security guard ni Dela Cruz a naawanan iti panggedan gapu iti angol, ngem inaramatna ti kabaelannaa kas visual artist ket nakapartuat kadagiti nadumaduma a pangdekorasion iti balay, agraman dagiti masetera a pagaayat dagiti "plantita."
Maysa kadagiti naiparang ni Amanda Battad manipud iti Bataan, nga agtagikua iti Amanda's Marine Products. Nangrugi ni Battad a nagaramid iti tinapa iti sango laeng ti balayda, agingga iti immadu ti produktona a kas ti napindang a bangus, dilis, laki (pusit), ken ti armang.
Kinuna ni Battad nga idi nabiit pay a nakipaset iti Likhaan Trade Fair, addada nanguyaw iti produktona a karing ken tinapa ket kinunada a "Para katulongan laeng" dagiti produktona. Saan nga isu ti nakaupayan ni Battad, ngem isu ketdi ti nangkarit kenkuana tapno pasayaatenna pay ti produktona.
Saan a nagbayag, napadayawan dagiti produktona a kas "Galing Bataan" gapu iti kinapintas ti kalidad dagitoy, ket mailaklako payen iti sabali a pagilian.
Nagyaman pay dagiti tallo a negosiante iti di agsarday a panangsaranay kadakuada ti DTI-3.
Inawis ni Serrano ti publiko a suportaanda ti Likhaan Trade Fair tapno matulongan dagiti MSME. (Lito Hilidon/Bannawag)
