Dinayaw dagiti embahador ti France ken Japan iti Filipinas ti kinatured ken kinamanangngaasi ni Angelyn Aguirre, ti Filipina a nars a napapatay iti panangraut ti Hamas iti Israel, gapu iti panagtalinaed daytoy iti sibay ti baket nga aywanna uray agpeggaden ti biagna.
Ti probinsia ti Pangasinan ti puon ni Aguirre, naipasngay isuna iti Quezon City ken nagturpos iti Nursing iti Our Lady of Fatima University.
Iti X (dati a Twitter) account-da, inyebkas da French Ambassador Marie Fontanel ken ni Japanese Ambassador Koshikawa Kazuhiko ti panangraemda iti dedikasion ni Aguirre iti propesionna.
"Rupa ti Filipinas" ti inyawag ni Fontanel ken ni Aguirre, idinto a maitutop unay ti nagan nga "Angeline" iti kababalinna sipud idi nayanak.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Fontanel a managtaripato ken nadungngo ni Aguirre iti aywanna a ni Nira, ket maysa itan nga anghel ti Dios ta iti panangtalinaed ni Aguirre iti sibay ti baket, nagbalin a biktima ti kinaranggas dagiti terorista a Hamas.
Inyebkas pay ni Fontanel ti pannakipagriknana kadagiti Filipino gapu kadagiti tallo a natay a Filipino idi rinaut dagiti terorista ti Israel, ket kinunana a dagiti lagip ni "Angeline," simbolo ti trahedia ngem kangrunaan iti amin, iti ayat ken kinatured dagiti Filipino.
Insurat daytoy ni Fontanel ken impaskilna ti tweet ni Deputy Mayor ti Jerusalem Fleur Hassan-Nahoum nga immuna a nangpadayaw ken ni Aguirre.
Iti paskil ni Hassan-Nahoum, kinunana a maysa a Filipina a nars ni "Angeline" a mangay-aywan ken ni Nira iti Kibbutz Kfar Gaza, ket nupay adda gundawayna idi a tumaray, impakita ni "Angeline" ti nakakaskasdaaw a kinataona ta dina pinanawan ni Nira iti tengnga ti panangranggas dagiti Hamas a nangpapatay kadakuada.
Inyebkas met ni Japanese Ambassador Koshikawa ti naimpusuan a pannakipagriknana iti pamilia dagiti Filipino a nars ken mangmangged a napapatay gapu iti panaggubat ti Israel ken Hamas.
Kinuna ni Koshikawa a raemenna unay ti dedikasion ken kinadungngoda uray addada iti ganggannaet a daga.
Nalagip ni Koshikawa ti kinadungngo dagiti Filipino a nagtalinaed iti Fukushima ken nangtaripato kadagiti nataengan nupay karigat ti panawen idi napasamak ti Great East Japan Earthquake idi Marso 2011.
Inngaton ti Filipinas ti Alert Level 3, wenno boluntario a panagawid, dagiti Filipino iti Gaza iti tengnga ti panaggubat ti Israel ken Hamas a nangkeltay iti biag ti 1,300 a tao iti Israel idinto a 1,900 iti Gaza.
Adda lokal ken ganggannaet a kinautibo dagiti Hamas idinto nga ikagkagumaanan dagiti dadaulo dagiti nadumaduma a pagilian nga iruar dagiti umilida iti Israel ken Gaza. (Raymund Antonio/Manila Bulletin//Lito Hilidon/Bannawag)
