Mapan a PhP300,000 ti gatad ti kuarta ken dadduma pay a tulong ti ipaay ti gobierno iti tunggal pamilia dagiti Filipino a natay gapu iti panaggubat ti Israel ken Hamas.
Daytoy ti impakaammo ti Presidential Communications Office (PCO) kalpasan a kompirmaren ti Department of Foreign Affairs (DFA) nga adda Filipino a natay gapu iti gubat iti Israel.
PhP200,000 ti ited ti Overseas Workers Welfare Administration (OWWA) iti naulila a pamilia dagiti tallo a Filipino a natay iti Israel, idinto a PhP50,000 ti ipaay a tulong ti Department of Migrant Workers (DMW).
Mangted pay ti OWWA ken ti DMW iti PhP20,000 a tulong para iti pannakaitabonda. Malaksid daytoy, ibaklay ti dua nga ahensia ti pannakayawid ken bayad iti transportasion manipud iti eropuerto agingga iti pagtaenganda iti Filipinas.
TURISMO: Intayon Idiay Ayuyang Garden iti Pila, Siudad ti Laoag!
PhP20,000 ti ited ti OWWA kadagiti saan nga aktibo a miembro, idinto a PhP50,000 ti ited ti DMW. Mabalin pay a ngumato daytoy, segun iti pangngeddeng ni Presidente Marcos ken DMW officer-in-charge Undersecretary Hans Leo Cacdac.
Minandar ni Presidente Marcos dagiti maseknan nga ahensia a mangipaayda iti tulong a para iti edukasion kadagiti annak dagiti biktima, tulong iti pagbiagan, tulong-medikal ken sikolohikal kadagiti biktima ken iti pamiliada. (Argyll Cyrus Geducos//Manila Bulletin//Lito Hilidon)
