CSC PAGASA AWARD. Inawat itay nabiit ti grupo ni Dr. Marilou P. Lucas, director ti Extension Services ken team leader ti grupo, ti pammadayaw a CSC Pagasa Award, Group Category nga impaay ti Civil Service Commission (CSC). Naiyawat ti pammadayaw iti pannakaisayangkat ti 2023 Regional Recognition and Awards Rites, iti CSC Regional Office 1, San Fernando City, La Union bayat ti pannakarambak ti maika-123 a Philippine Civil Service Anniversary. Inawat ti grupo ti pammadayaw babaen ti proyekto nga "Empowering Communities Through the School-on-the-Air (SOA) Program During the COVID-19 Pandemic: The MMSU Experience." Buklen ti MMSU team da Dr. Marilou P. Lucas, Dr. Aris Reynold V. Cajigal, Mercy Fausta R. Gaño, Bella C. Gervacio, ken Sherlyn B. Nicolas. Daytoy ti maikadua a gundaway nga awaten ti extension team ti CSC Pagasa Award. Immuna idi 2017 iti proyekto a Seedstock Dispersal Program. Nairaman iti ladawan dagiti pannakabagi ti HAP Regional Committee on Awards 2022 Regional Search for Outstanding Government Workers nga indauluan ni Director Hedy Jose B. Lardizabal ti CSC Regional Office 1. Nairaman pay iti ladawan ni Atty Rex R. Ami, director ti CSC, Ilocos Norte (umuna a ladawan).
Inawat met ni Prof. Zaldy A. Fernandez (nakaiggem iti sertipiko) ti isu met laeng a pammadayaw iti benneg ti individual category. Nayawat met ken ni Ms. Pauline Balangue manipud iti Human Resources Office ti sertipiko a kas nominator ni Professor Fernandez (Mercy R. Gaño).
(Naipablaak iti Nobiembre 1-15, 2023 a bilang ti Bannawag.)
