Impasardeng ita (Oktubre 18) ni Presidente Ferdinand "Bongbong" Marcos Jr. ti naipaulog nga Implementing Rules and Regulations (IRR) ti Republic Act (RA) 11954 wenno Maharlika Investment Fund (MIF) Act of 2023, tapno maatur ti proseso ti panagaplay ken pananginominar kadagiti kangrunaan a posision iti Maharlika Investment Corporation (MIC).
Kinuna ni Executive Secretary Lucas Bersamin a nasuspende ti IRR ta kayat pay nga adalen a naimbag ni Presidente Marcos daytoy.
Maibatay iti agdama nga IRR, ti Advisory Body a buklen dagiti sekretario ti Department of Budget and Management (DBM), ti National Economic and Development Authority (NEDA), ken ti Bureau of the Treasury (BTr), ti addaan karbengan a mangirekomendar iti madutokan a kameng ti Board of Directors ti MIC, iti Presidente ti Filipinas.
Ngem saan a nadakamat ti agdama a linteg no ania ti mabalin nga aramiden no saan a magustoan ti presidente dagiti rekomendasion nga indatag ti Advisory Body.
TURISMO: Intayon Idiay Ayuyang Garden iti Pila, Siudad ti Laoag!
Itay Oktubre 3, pormal nga indatag ti Advisory Body iti Malakanyang dagiti 13 a kandidato nga agpaay a Presidente ken CEO (PCEO), dagiti regular a direktor, ken dagiti agwaywayas a direktor.
Maysa kadagiti mabalin a mabaliwan iti IRR ti pannakaipaay ti kalintegan iti Presidente ti Filipinas a mangdutok iti tao a saan a nangidatag iti aplikasionna para iti posision.
Nagserran ti panawen ti aplikasion ken nominasion iti MIC idi Septembre 27. Ita, masapul a dutokan ti Presidente ti agpaay a PCEO, 2 a regular direktor, ken 3 nga agwaywayas a direktor ti MIC.
Manamnama nga agtignayton ti MIC iti ngudo ti tawen. (Chino S. Leyco/Manila Bulletin//Lito Hilidon/Bannawag)
