Da La Union Governor Raphaelle Ortega-David (tengnga) ken dagiti probinsial nga opisial ti National Food Authority ken Department of Agriculture kalpasan ti panangpirmada iti memorandum of agreement para iti Palay Marketing Assistance Program for Legislators and Local Government Units project a nangnayon iti presio ti paggatang iti irik dagiti mannalon ti La Union. (Ladawan: Pammadayaw ti Gobierno Probinsial ti La Union)

Nanayonan iti PhP5 ti paggatang ti NFA iti tunggal kilo ti irik iti La Union babaen ti panangidagadag ti gobierno probinsial iti National Food Authority (NFA) ken iti Department of Agriculture (DA), tapno maallukoy dagiti mannalon a mangilako kadagiti apitda iti NFA.

Manipud iti dati a PhP19 a presio a paggatang, PhP24 itan ti tunggal kilo, segun ken ni NFA La Union Statistician Maricel Baliton. Innayonna a manamnama nga ipangruna dagiti mannalon ti agilako iti irikda iti NFA gapu iti baro a presio. Kinunana pay a dagiti pribado nga aggatgatang iti irik, PhP20 agingga iti PhP25 ti paggatangda.

Segun pay ken ni Baliton, targetda ti makagatang iti 270,000 a sag-50 a kilo a sako ti irik kadagiti mannalon ita a tawen, iti Septiembre agingga iti Disiembre.

Innayonna nga addaan ti La Union iti mapan a 68,000 agingga iti 70,000 a mannalon, ngem saan a manamnama nga ilako amin dagitoy ti apitda ta adda dagiti agtaltalon iti agpaay laeng para iti pamiliada.

Eksklusibo iti Website
TURISMO: Intayon Idiay Ayuyang Garden iti Pila, Siudad ti Laoag!

TURISMO: Intayon Idiay Ayuyang Garden iti Pila, Siudad ti Laoag!

Segun met iti La Union Provincial Information Office, supsuportaran ni Gobernadora Raphaelle Ortega-David ti napateg nga akem dagiti mannalon iti panagdur-as ti ekonomia ti probinsia, kas mayannatup iti panggep a panamagbalin iti probinsia a kas "Heart of Agri-Tourism in Northern Luzon" no madanon ti 2025. (Hilda Austria/PNA)