Nagturay ti tagnawa kadagiti ginasut a Filipino a nalakon iti Gaza idinto nga awananda iti taraon, danum ken dadduma pay a kangrunaan a kasapulan gapu iti pannakalakub ti teritorio ti Palestine.
Kinuna ni Department of Foreign Affairs (DFA) Undersecretary Eduardo Jose de Vega a sibibiag ti anag ti tagnawa kadagiti Filipino nga agur-uray iti pannakalukat ti nagbedngan ti Egypt ken Gaza.
Ti nakurang a suplay ti taraon, gasolina, koriente ken danum iti Gaza ti inaldaw a paspasaren dagiti Filipino iti teritorio ti Palestine.
Rimmigat pay ti kasasaadda idi serraan ti Israel ti amin a beddengna a nanglapped iti iseserrek dagiti ayuda gapu iti pananggubat ti Isreal iti Hamas a mangiturturay ita iti Gaza.
TURISMO: Intayon Idiay Ayuyang Garden iti Pila, Siudad ti Laoag!
Dagiti Filipino nga adda balayda iti umabagatan ti Gaza, nga asideg iti Egypt, nangidiayada iti pagdagusan kadagiti kailianda a pimmanaw iti amianan a paset.
Mangibingbingay dagiti Filipino idiay iti taraon ken dadduma pay a suplay.
Kinuna ni de Vega a ti panagtitinnulong dagiti Filipino ti makaigapu a nadaeranda ti rigat ken panagbisin tapno malasatanda dagitoy.
Adda itan iti asideg ti beddeng ti Egypt dagiti opisial ti embahada ti Filipinas a mangsaranay kadagiti Filipino apaman nga maluktan ti beddeng. (Joseph Pedrajas/Manila Bulletin//Lito Hilidon/Bannawag)
