Pinakdaaran ni Commission on Elections (Comelec) Chairman George Erwin Garcia dagiti agngayangay iti Barangay and Sangguniang Kabataan Elections (BSKE) a siiinget nga ipatungpal ti ahensia dagiti alagaden iti panagkampania a mangrugi ita (Oktubre 19) agingga iti Oktubre 28.
Kinuna ni Garcia a saan koma nga yaleng-aleng dagiti kandidato ti determinasion ti Comelec a mangipatungpal iti linteg ti eleksion, ta napinget daytoy iti panagturay ti linteg.
Maiparit ita a panawen ti eleksion ti panangikkat, panangperdi, panangpukaw, panangdadael, ken pananglapped iti pannakaiwaras dagiti nainkalintegan a propaganda; panangipaskil, panangiwaras, ken panangaramat iti di umisu a ramen ti panagkampania; panangited iti donasion wenno regalo, kuarta wenno ania man a banag; panangdutok wenno panangaramat iti polis, espesial wenno kompidensial nga ahente; panangaramat iti ania man a nakabalan a lugan; polis wenno guardia ti probinsia kas guardia ti opisial wenno kandidato.
Maiparit pay ti panangiruar, panagibunong, ken panaggasto iti pondo ti gobierno; panangpatakder wenno panangmantener iti kalsada wenno rangtay a pinonduan ti barangay; panangdutok wenno panangimpleo iti baro nga empleado, panangbukel iti baro a posision, panangital-o wenno panagingato iti sueldo, panagbayad iti pribilehio iti barangay.
TURISMO: Intayon Idiay Ayuyang Garden iti Pila, Siudad ti Laoag!
Innayon ni Garcia nga iti panangrugi ti kampania, saanda a palukayan ti panangipatungpal kadagiti paglintegan, ngem madoble ketdi ti gagemda tapno masinunuo ti pannakaannurot dagitoy.
Inyunay-unay ni Garcia a maiparit ti mangted iti baller, t-shirt, kallugong wenno ania pay a banag, bassit man wenno dakkel, ta kunana, a napimpintas no suroten dagiti kandidato ti pagalagadan a mapanda kadagiti balbalay nga awan ti ania man a mayawat wenno maitedda, idinto nga agaammoda metten iti barangay, isu a saanen a nasken a mangted iti t-shirt, baller, wenno kallugong.
Kinuna ni Committee on Kontra-Bigay (CKB) Secretary Glinis Tamondong a maiparit ti panangiwaras iti ayuda manipud iti panawen ti kampania agingga iti aldaw ti eleksion, malaksid kadagiti kadawyanen a maipapaay kadagiti kualipikado a tao kas iti kangrunaan a kasapulan a taraon, transportasion, panagpaagas, edukasion, panangipunpon, ken dagiti kaarngina.
Iti rabii sakbay ti eleksion (Oktubre 29), maipariten ti agkampania, agraman panangted wenno panangawat iti libre a transportasion, taraon, inumen, wenno ania pay a banag, kasta met ti panaglako, pannaggatang, panangidiaya wenno panaginum iti arak agingga iti aldaw ti eleksion. (Dhel Nazario/Manila Bulletin//Lito Hilidon/Bannawag)
