Impasigurado ni Ilocos Norte 1st District Rep. Ferdinand Alexander Marcos ti pannakakompleto ti proyekto a Patapat Viaduct 2 iti Pagudpud, Ilocos Norte iti sumaruno a dua a tawen, babaen ti pannakailatang ti PhP2-bilion a pondo manipud iti gobierno nasional.
Kinuna ni Rep. Marcos a maibilang ti Patapat Viaduct 2 a maysa kadagiti kadakkelan a proyekto nga impraestruktura ti administrasion a Marcos, a manamnama a mangpaannayas iti panagbiahe ti publiko iti amianan a Luzon.
"Ammotayo no kasano kapateg daytoy iti presidente," kinuna pay ni Rep. Marcos a nangdakamatanna iti naynay a pannakaiserra ti dalan iti Manila North Road iti Barangay Pancian iti Pagudpud gapu kadagiti panagreggaay ti daga ken batbato no kasta nga agdawel ti panawen.
Addan pangrugian a PhP300-milion a pondo iti daytoy a tawen isu a rinugianen ti Department of Public Works and Highways (DPWH) ti konstruksion ti viaduct i'toy a bulan.
TURISMO: Intayon Idiay Ayuyang Garden iti Pila, Siudad ti Laoag!
Idi Mayo, linuktan ti DPWH ti proseso ti bidding para iti proyekto ket nangalada iti Japanese consultant a mangtulong a mangaramid iti namodmoderno a viaduct para iti ili ti Pagudpud.
No panawen ti tudtudo, gapu iti reggaay, masansan a malakon dagiti motorista ken agbibiahe a lumaslasat kalsada nasional iti Pancian a mamagsilpo kadagiti rehion ti Ilokos ken Tanap ti Cagayan.
Malagip a nabangon ti umuna, ken agdama, a Patapat viaduct idi panawen ni dati a Presidente Ferdinand E. Marcos Sr., tapno mangsolbar iti problema ti panagreggaay ti bantay a kimmalipkipan ti kalsada.
Naipatakder ti rangtay wenno viaduct iti 31 a metro iti ngatuen ti baybay isu a nalayang a mabuya ti napanayag a pakabuklan ti Pasaleng Bay iti maysa a bangir ken ti Cordillera Mountain Range iti sabali a bangir. (Leilanie Adriano/PNA)
