Agdagup iti 95 nga Overseas Filipino Workers (OFWs) a naabuso iti Saudi Arabia ti pagawiden ti Department of Migrant Workers (DMW) kas paset ti programa ti gobierno.
Kinuna ni DMW officer-in-charge Undersecretary Hans Leo Cacdac a manamnama a sumangpet iti Ninoy Aquino International Airport Terminal 3 (NAIA-3) dagiti 95 nga OFW, a pakairamanan ti tallo nga ubbing, ita nga aldaw (Oktubre 21).
Segun ken ni Cacdac, dagiti kameng ti Migrant Workers Office iti Riyadh (MWO-Riyadh) ti nangurnos iti panangbiaheda iti eroplano. Sakbay a pumanaw dagiti nadakamat nga OFW iti Saudi Arabia, adda maited a US$200 tunggal maysa, kas pinansial a pangsuportar manipud iti AKSYON (Agarang Kalinga at Saklolo para sa mga OFWs na Nangangailangan) Fund.
Naggapu ti AKSYON Fund iti General Appropriations Act para kadagiti naabuso nga OFW iti entero a lubong. Nailatang daytoy a pondo gapu iti parikut dagiti OFW kas iti panagabuso dagiti amo a makaigapu iti panaglibas wenno pannakaalawda.
TURISMO: Intayon Idiay Ayuyang Garden iti Pila, Siudad ti Laoag!
Innayon pay ni Cacdac nga apaman a makasangpet dagiti 95 nga OFW, tulongan ida ti Repatriation Assistance Division ti OWWA (Overseas Workers Welfare Administration).
Mangted ti OWWA ken DMW ti tulong a kuarta kadagiti OFW ken paglugananda nga agawid iti bukodda a lugar. (Aaron Recuenco/Manila Bulletin//Lito Hilidon/Bannawag)
