Kiniddaw ni Barangay Health Workers (BHWs) Party-list Rep. Angelica Natasha Co kadagiti agngayangay iti Barangay and Sangguniang Kabataan Elections (BSKE) a madakamat koma iti panagkampaniada no kasano nga ipatungpalda dagiti paglintegan ken programa ti gobierno iti lokal a tukad, ken no ania ti maited dagitoy a pagsayaatan iti biag dagiti iturayanda.
Kinuna ni Co a nasken daytoy tapno maammuan dagiti umili a para kadakuada dagiti paglintegan ken nasken a pagnumaranda dagitoy.
Ti Republic Act (RA) 11960 wenno ti "One Town One Product" (OTOP) Law ti
maysa kadagiti paglintegan a nasken maipaulog ken maipatungpal iti barangay ta mangparnuay daytoy iti panggedan ken baro a pagsapulan iti komunidad; kasta met ti RA 11953 wenno ti New Agrarian Emancipation Act, a nangpakawan iti utang dagiti nasurok a 610,000 a benepisiario ti agrarian reform.
Innayon pay ni Co a ti RA 11961 wenno ti naamendaran a National Cultural Heritage Act ket napateg unay para iti cultural mapping iti lokal ken panangtaginayon iti kultural a lugar nga addaan naisangsangayan a pateg iti pagbiagan, turismo, ken kannawidan.
TURISMO: Intayon Idiay Ayuyang Garden iti Pila, Siudad ti Laoag!
Inyunay-unay ni Co ti RA 11930 wenno Anti-online Sexual Abuse or Exploitation of Children (OSAEC), ta napeggad ken mapaspasamak dagitoy kadagiti ubbing ken agtutubo.
Nangrugi ti kampania itay Oktubre 19 agingga iti 28. (Filane Mikee Cervantes/PNA//Lito Hilidon/Bannawag)
