Masapul nga ideklarar a dagus dagiti Local Government Units (LGUs) ti State of Calamity apaman a makompirmar ti panagraira ti African Swine Fever (ASF) iti lugarda.
Daytoy ti imbilin ni Department of Agriculture (DA) Undersecretary Deogracias Victor Savellano kadagiti LGU a naapektaran ti ASF idinto a kasapulanda ti pondo iti panangsarangetda iti sakit.
Kinuna ni Savellano nga kasapulan unay a maiwayat dagiti panagpaasuk, panangipasdek iti pagbugguan iti saka (foot bath), ken dadduma pay a wagas ti pangdalus tapno malapdan ti panagakar ti sakit iti dadduma a pagtaraknan ti baboy. Innayon ni Savellano a upay nagastos dagitoy a wagas, nasken a maipatungpal dagitoy iti entero a probinsia tapno malapdan ti panagwaras ti sakit.
Dinakamat ni Savellano kas ehemplo ti kaso ti ASF iti Nueva Vizcaya a nagraira iti 133 a pagtaraknan iti baboy iti 9 nga ili, nga agkasapulan la unay iti pondo.
TURISMO: Intayon Idiay Ayuyang Garden iti Pila, Siudad ti Laoag!
Nagdeklara iti State of Calamity ti probinsia ti Nueva Vizcaya idi Oktubre 16 idi ipakaammo ti beterinario ti probinsia nga 1,300 a baboy ti nagpositibo iti ASF.
Iti pattapatta ti Nueva Vizcaya Provincial Veterinary Office (NVPO), mapan a PhP120-milion ti mabalin a mapukaw ti industria gapu iti ASF.
Kinuna ni Savellano nga ad-adalenen ti DA dagiti dua a manamnama a bakuna kontra ASF, ket apaman a maaprobaran ti nasamay a bakuna, panggep ti DA a bakunaan ti 80% ti populasion ti baboy iti entero a pagilian.
Segun ken ni Dr. Arlene Vytiaco, Deputy Director ti Bureau of Animal Industry (BAI), nasken nga agideklarar iti State of Emergency ti nasurok a 2 nga ili iti probinsia a naapektaran ti ASF tapno mairuar ti disaster fund nga usarenda tapno malapdan ti panagwaras ti sakit. (Miguel Gil/PNA//Lito Hilidon/Bannawag)
