Pinusgan ni Presidente Ferdinand "Bongbong" Marcos ti Philippine Coast Guard (PCG) a mangimbestigar iti kaudian a pasamak iti West Philippine Sea (WPS), a panangdungpar ti barko ti China iti bilog ti Filipinas a nangiwayat iti Rotation and Resupply (RORE) mission iti BRP Sierra Madre iti Ayungin Shoal.
Impaulog ni Presidente Marcos daytoy a bilin iti naangay a Command Conference dagiti opisial dagiti ahensia a mangtaming iti seguridad, iti Malakanyang tapno pagsasaritaanda ti panaglabsing ti China iti WPS.
Innayon pay ni Presidente Marcos a ti napeggad, ilegal, ken dinadarasudos a panagtignay ti barko ti China Coast Guard (CCG) ti makaigapu iti panagdinnungpar a nangdadael iti barko ti Filipinas iti uneg ti bukodna a teritorio (Exclusive Economic Zone wenno EEZ), ken ibilang ti gobierno a serioso a banag daytoy.
Kinuna ti National Security Council (NSC) itay Domingo (Oktubre 22) a napeggad ti panagmaniobra ti barko ti CCG.
TURISMO: Intayon Idiay Ayuyang Garden iti Pila, Siudad ti Laoag!
Iti umuna a pasamak, nagdinnungpar ti barko ti CCG Vessel 5203 (CCGV 5203) iti bilog ti Filipinas (Unaiza May 2) a mangyeg iti suplay gapu iti nadarasudos ken iresponsable a panagtignay ti CCGV5203 tapno bangenanna ti barko ti Filipinas.
Iti maikadua a pasamak, dinungpar ti Chinese Maritime Militia vessel 00003 (CMMV 00003) nga aktibo a mangrirriribuk ken manglapped iti barko ti PCG nga MRRV 4409.
Kinuna ni National Security Adviser Eduardo Año nga uray kasta ti napasamak, saanda nga agbuteng, ngem ituloy latta ti Filipinas ti mangitulod iti suplay dagiti soldado iti BRP Sierra Madre.
Kinuna ti PCG a natalged ken awan ti nadangran a kameng ti barko ti Filipinas. (Argyll Cyrus Geducos/Manila Bulletin//Lito Hilidon/Bannawag)
