Daniw ni FELICIDAD T. UNITE
Nakaskasdaaw dayta kalanggiking
a mangsangal iti umok ni kinapalangguad--
kinapalangguad a mangimameg
iti maysa a parsua a marigrigat.
Nabileg met dayta rimat
a mangbulsek iti naagum a puso
tapno agaramid iti di maikanatad.
Ngem no maaramat dayta sileng
a pangalaw iti kararua
a dandanin malmes iti rigat,
dinto aglumen wenno agkupas
ti lagip ti impaaymo a kinaimbag.
Naipablaak iti Septiembre 5, 1960 a bilang ti Bannawag.
Daniw
