Ni HONOR BLANCO CABIE
1
dekada -- maysa, dua -- kalleppas ti
libunglibong, iti salaan no
rugian nga ungnguen da apo musiko
iggemda mariingen rabii.
5 a Daniw
maikadua pay la 'diay panagtupak
salaen a tokar lallaki 'tay
addan sangnguanan 'tay isala, ay!
aribai maaddaan ragsak.
ngem 'di siddaawko dinisnognak:
awan met 'tay panagbusingar 'diay
bibig lallaki da aribai
tumakderda awan aliaw, amak.
ania a kannawidanen daydiay,
wingwingiwingak la ket ti puli.
2
Nauneg ksla ngkalyan kamangeg ngem amin a linaon na kt nabagas kaipapanan na...
--maysa a mensahe iti nasaliwanwan a malem.
panagsalsalada 'ti sirok 'diay
tuktok bantay anian nga apalna
'diay bulan, ay! isut' namurmuray
iti ladawan dagiti adda't baba.
panagdalluyon 'diay barukongda
kayat 'diay bulan a ruk-atanen
kapetnat' langit nagbitinanna,
mapan 'diay abaydan makilangen.
nakitadat' maysa a nagkalian
kamangeg nangited 'tay simbolo,
mano pay nga askaw impasnekdan,
nagginggineden lubong ni pedro.
pati kaykayo 'ti aglawlawda
kas man naspaken amin a sanga.
3
Emcee iti salaan probinsia: Daytoy a box (nabalkot iti papel a makan) agraman daytoy maysa a butil ti anisado, agbalor dua a pisos ken singkuenta sentimos.
Lalaki: Plus two pesos.
Emcee: Agbaloren iti four pesos ken singkuenta sentimos.
Isu met la a lalaki: With music.
Emcee: Music, maestro.
--maysa a ladawan kadagiti pasosial iti salonan
kadagiti kalgaw immun-una,
apagtakder pay lan lalaki 'diay
sangnguanan ading a balasang, ay!
addan mangala 'tay impukkawda.*
awan tokaren – ay! ay-ayda pay:
adda la 'tay mabainan, ay! ngem
ania ngarud agkurang nailaem,
urayem 'diay adu** 'tay naiburnay.
kadagidi a panawen adda
bumukolbukol met kadagiti
bulsa ti pantalon, umanges pay
no 'tay kuartan daydiay bilangenda.
ragsak umatiperper rabii:
'tay puyat regregen 'tay murmuray.
* impukkaw ti sabali a lalaki: plus three pesos without music (P7.50 daydiay box ken anisado: currency exchange rate kadagidi a panawen $1=P2).
** iti pagsasao iti salonan idi: “nangtop” ti aramatda.
4
Emcee iti salaan probinsia: Daytoy a piesa, kakabsat, isu daytay lady's choice. Ngem kiddawko a no kayatyo ti mangisala kadagiti musiko, maysa laeng ti alaenyo tapno adda mabati nga agtokar. Music, maestro.
--nakasab-it a lagip no dagiti babbalasang ti pagpilienda a mapan mangpili iti kasalada kadagiti immun-una a panawen, idi awan pay selpon.
apagammol pay la't padila 'diay
tenor ni mang justin, atanudko,
ta aggigiddandan mapan sadiay
yan 'tay kaubingan a musiko.
limada nga agturturong sadiay
yan ni nakatugaw a musiko,
dapanda kurangda la nga agtaray,
anian nga apalda ken 'tanudko.
tumaktakder pay la ni 'tanud ta
pinetpetanen ni balasang 'diay
pangsiketna a kanawan, alla,
ragsak ni 'tanud ta agraraay.
atiddog sa la unay piesada,
awanen 'tay bannog saksakada.
5
no piestat' ili 'tay umadani
iti kalgaw sellag nga addaan
da 'tanudko a ta rinabii
agtoktokarda met 'ti salonan.
mapastrek kandidata a gapu
daydiay pasala nga agpatpatnag
inton kambasing igabsuonto –
dinakkelak dayta a saad biag.
panagtokar da 'tanudko adda
maibulsa a yawid 'diay balay
igatang 'tay pangsanggir puyatda,
mata sigkatenna, mamurmuray.
no 'tay malaglagipko dagitoy, kunak
anian ni 'tanudko napnuan ragsak.
