Naisayangkat ti "Innadal ken Panaglaga Kadagiti Balikas," seminar iti lengguahe ken literatura nga Ilokano iti Santa Teresita, Cagayan idi Oktubre 14, 2023 babaen ti panagtitinnulong ti Gunglo dagiti Mannurat nga Ilokano iti Filipinas (GUMIL Filipinas), Gunglo dagiti Mannurat nga Ilokano iti Cagayan (GUMIL Cagayan), gobierno munisipal ti Santa Teresita, ken ti Komisyon sa Wikang Filipino (KWF).

Nasurok a 80 ti nagatendar iti seminar a kaaduanna dagiti mannursuro, mannurat, agiwarwarnak ken dadduma pay a naayat iti panagsurat ken iti literatura.

Nagpaay a lecturer iti seminar da Raquelito B. Cenal para iti panagaramat iti umno nga ortograpia nga Ilokano, Presidente ti GUMIL Cagayan Rolando A. Seguro Jr. para iti panagsurat iti daniw a para ubbing, Presidente ti GUMIL Filipinas Ariel Sotelo Tabag para iti panagsurat iti sarita a para ubbing, ken dati a Presidente ti GUMIL Filipinas Arthur P. Urata Sr. para iti radio broadcasting ken panagsurat iti damdamag.

Ni Raquelito B. Cenal, lecturer iti Ilokano orthography.
Ni Rolando A. Seguro, lecturer iti panagsurat iti daniw a para ubbing.
Ni Arthur P. Urata Sr., lecturer iti radio broadcasting ken panagsurat iti damdamag.
Ni Ariel Sotelo Tabag. lecturer iti panagsurat iti sarita a para ubbing.

Naangay met ti on-the-spot a salip iti panagsurat iti daniw a para ubbing ket inyalat ni Cherry B. Sunico ti Smart, Gonzaga, Cagayan ti umuna a gunggona. Ni met Emelyn T. Villegas ti Paradise, Gonzaga, Cagayan ti maika-2 a gunggona; ken ni Christine C. Castillo ti Casagan, Sta. Ana, Cagayan, maika-3 a gunggona. Naikkan met iti pangliwliwa a gunggona da Bienalyn A. Baclig ti Progressive, Gonzaga, Cagayan; Lorivel P. Ascueta ti Pateng, Gonzaga, Cagayan; ken Ma. Teresa A. Andres ti Calayan, Gonzaga, Cagayan. Naipaayan dagiti nangabak iti premio a kuarta nga indonar ti sumagmamano a nagatendar.

Eksklusibo iti Website
Manipud Kadagiti Agdama a Kameng ti Bannawag: Dios ti Agngina!

Manipud Kadagiti Agdama a Kameng ti Bannawag: Dios ti Agngina!

Naaramid pay ti tree planting sakbay ti seminar, iti Barangay Centro West, nga indauluan da dati a bokal ti Segunda Distrito ti Cagayan ken dati a Presidente ti GUMIL Filipinas Vilmer V. Viloria ken agdama a bokal ti Umuna a Distrito ti Cagayan Romeo Garcia ken inatendaran dagiti kameng ti GUMIL Cagayan, GUMIL Filipinas, ken Mangngaggo Club.

Panagmula iti kayo: Da (agpakanawan) Derick Marcel F. Yabes, Rolando Seguro Jr., Vilmer V. Viloria, Board Member Romeo Garcia, Rodel Ordillos, Raquelito B. Cenal, ken Ariel S. Tabag.

Nagyaman met ni Mayor Rodrigo P. De Gracia iti pannakapili ti ili a Santa Teresita a nakaangayan ti "Innadal ken Panaglaga Kadagiti Balikas" ken impaganetgetna ti suportana kadagiti sumarsaruno pay a programa ti GUMIL Cagayan ken GUMIL Filipinas.

Ni Santa Teresita Mayor Rodrigo P. De Gracia.

Malagip a tubo iti nasao nga ili ti adu a mabigbigbig a mannurat nga Ilokano a pakairamanan da Dionisio S. Bulong (Brgy. Simbaluca) a dati nga editor-in-chief ti Bannawag; Prodie Gar. Padios (Brgy. Simpatuyo), dati a literary editor ti Bannawag; ken Ariel Sotelo Tabag (Brgy. Villa), agdama a poetry editor ti Bannawag. (GUMIL Cagayan Secretariat/Ladladawan: Raquelito Cenal, Vilmer Viloria, Derick Marcel Yabes)