Inaprobaran ti Commission on Elections (Comelec) itay Oktubre 24 ti pannakasuspende ti proklamasion dagiti mangabak a kandidato nga addaan iti kaso a mainaig iti Barangay and Sangguniang Kabataan Elections (BSKE).
Segun iti datos nga imbatad ti Comelec idi Oktubre 20, adda naipiladan a 165 a petision para iti pannadiskualipikar ti kandidato; 7,103 a show cause order (SCO); ken 327 a subpoena ti nairuar, gapu iti nasapa a panagkampania (premature campaigning). 341 nga SCO ti naipila ti Comelec gapu iti ilegal a panagkampania.
Maibatay iti Comelec Memorandum 231111, saan a maiproklamar dagiti adda nasken a sungbatanda a petision kas ti pannakakanselar iti Certificate of Candidacy (CoC); pannakaideklarar kas nuisance candidate; ken pannakadiskualipikar.
Impaganetget ti Comelec En Banc ti karbengan daytoy a mangipasardeng iti proklamasion no adda natibker nga ebidensia iti 'di pay naresolba a petision, segun iti Section 600 ti Comelec Resolution 10924.
Manipud Kadagiti Agdama a Kameng ti Bannawag: Dios ti Agngina!
Inlawlawag ni Comelec Chairperson George Erwin Garcia a mabalinda nga aramiden daytoy idinto a maipatugaw dagiti nangabak iti posision inton Disiembre 1.
Innayon ni Garcia a no bilang ta ti nangabak a Barangay Chairman wenno SK Chairman ti addaan iti kaso, ti nangabak a Kagawad wenno SK Kagawad a nakaala iti kaaduan a botos ti mangsandi a kas acting official. (Stephanie Sevillano/PNA//Lito Hilidon/Bannawag)
