Manen, adda maysa a bannuar.
Bannuar ti panangmatmat ti Israel iti Filipina a caregiver kalpasan ti panangsarangetna iti terorista a Hamas tapno maispal ti biagna ken ti agtawen ti 95 nga amona idi rimmaut dagiti Hamas idi Oktubre 7.
Ni Camille Jesalva, maysa a Caregiver, ti mangtartaripato iti amona a baket a ni Nitza Hefetz idi sinerrek dagiti terorista a Hamas ti pagtaenganda.
Segun ken ni Ilan Fluss nga Embahador ti Israel iti Filipinas, iserra koman ni Camille ti rikep ngem nakastreken ti operatiba ti Hamas iti balayda.
Manipud Kadagiti Agdama a Kameng ti Bannawag: Dios ti Agngina!
Nagpakaasi ni Camille iti terorista nga saanna koma ida a papatayen, ket alaenna lattan ti ania man a kayatna iti balay. Indiaya pay ni Camille ti kuartana iti terorista.
Kinuna ni Fluss nga adda kuarta ni Camille a NIS1,500 (agarup PhP21,000) idinto nga agawid koma daytoy iti Filipinas kalpasan ti dua nga aldaw.
Inted ni Camille ti kuartana kadagiti terorista ket nagpakaasi daytoy a dida sagsagiden ti baket. Innala dagiti terorista ti selpon ni Camille ken amin a kayatda nga alaen iti balay sa pimmanawdan.
Inarakup ni Camille ni Nitza iti las-ud ti dua nga oras iti uneg ti nagkamanganda a protected room agingga a simmangpet dagiti soldado ti Israel.
Kinuna ni Fluss a naisangsangayan ti inaramid ti Filipina a caregiver ta nupay simple laeng ti panangipamuspusanna, isu ti nangispal iti biagda.
Innayon pay ni Fluss a ti inaramid ni Camille ti pakakitaan ti kinamanagtaripato dagiti Filipina.
Sakbay a bimtak ti gubat, adda agarup 30,000 a Filipino iti Israel, ket caregiver ti kaaduan kadakuada a naibilang metten a kameng ti pamilia dagiti amoda.
Iti agdama, addan 4 a Filipino a natay gapu iti panaggubat ti Israel ken Hamas, idinto a di pay ammo ti yan dagiti dua.
Impanamnama ti Israel ti kinatalged ti biag dagiti Filipino iti tengnga ti gubat, ket nangitukonda iti tulong kadagiti pamilia dagiti napapatay. (Argyll Cyrus Geducos/Manila Bulletin//Lito Hilidon/Bannawag.)
