Maangay ita (Oktubre 27) ti konsierto ti Kabataang Silay Ensemble (KSE) Rondalla iti Laura Vicuna Women Development Training Center, Hacienda Malihao iti Victorias City, Negros Occidental, a pakaitampokan dagiti orihinal a putar a samiweng dagiti kameng ti Women Composers of the Philippines (BAYi).
Sumagmamano kadagiti orihinal a putarda dagitoy: “Luksong Tinik” ni Dr. Marie Jocelyn U. Marfil; “Tukar” ni Prof. Mary Katherine J. Trangco; “Pagtutumbang Preso” ni Dr. Maria Christine M. Muyco; “Gameron” ni Gian Gianan; ken “Silay” ni Erma Dianne Decena.
Buklen ti KSE Rondalla dagiti nalaing a musiko nga estudiante iti elementaria, hayskul, ken kolehio. Ni Jeger Anjao ti daulo ken mangsansanay iti grupo, ken iwanwanwan ida ni Silay Mayor Joedith C. Gallego.
Nabukel ti KSE Rondalla idi 1994 tapno maitandudo ti turismo iti Silay (Negros Occidental) a nabaknang iti historia ken kultura.
Manipud Kadagiti Agdama a Kameng ti Bannawag: Dios ti Agngina!
Adda 100 nga aktibo a kameng ti KSA Rondalla, ket nadasigda iti lima -- manipud iti kangrunaan a grupo agingga iti agsansanay wenno baro a kameng, idinto nga adda 50 a kameng ti binukelda a KSE Dancers.
Kinuna ni Cultural Officer Achilles Corteza nga adun ti inyalat ti KSE Rondalla a pasalip kas iti National Music Competitions for Young Artists Foundation (NAMCYA) idi 1998, ken ti Asian Cultural Tour Grant nga impaay ti Cultural Center of the Philippines (CCP) manipud 2012 agingga iti 2014.
Babaen ti suporta ti Musicological Society of the Philippines (MSP), UP Center for Ethnomusicology, CCP ken National Commission for Culture and Arts (NCCA), dimmar-ayda iti Rondalla Workshops manipud 2016 agingga iti 2018 ket nagtokarda iti Scotland, Singapore, Taiwan, ken China.
Kinuna ni Gallego nga idinto nga adu ti mangawis iti KSE Rondalla kadagiti okasion, dakkel a katulongan ida ti turismo ta maliwliwa dagiti sangaili ken turista a mapan iti lugarda.
Innayon ni Gallego a supsuportaran ti Silay LGU dagiti kameng ti KSE babaen ti panangipaay iti scholarship ken pondo ti KSE tapno agtultuloy ti panagtokarda. (Shirley D. Sison/UPCMu//Lito Hilidon/Bannawag.)
