Naipaayan iti ayuda a sagsangaribu a pisos (PhP1,000) ti aganay a 803 nga agmulmula iti mais iti Santa Teresita, Cagayan itay nabiit manipud iti gobierno probinsial ti Cagayan.
Dagiti benepisiario dagiti napakaruan a naapektaran ti mulada a mais gapu iti layus a ginubuay dagiti kallabes a bagyo nga Egay ken Goring.
Sinuportaran ti gobierno munisipal ti Santa Teresita nga idauluan ni Mayor Rodrigo P. De Gracia ti aktibidad ti pannakaibunong ti ayuda a naangay iti municipal gymnasium ken inwanwan dagiti staff ti gobierno probinsial a da Pio Michael Matammu ken Gerardo Bergonia babaen ti panangasistar ni Municipal Agriculturist Edwin P. Madrid.
Segun iti Municipal Agriculture Office, isaruno nga ipaayan ti gobierno probinsial iti ayuda dagiti mangngalap a nalayus dagiti fishpond-da. (Edison B. Tobias)
