Daniw ni ORLINO SOL. PALACPAC
Naipasngayka idi mangrugi a tubngaren
ti lawag ti gagar ni sipnget
tapno matenneb ti arapaap
iti pudot ti lailom.
Simmagepsep 'ta kinalibnosmo
iti barukong a nangtagibi kenka
tapno maibinggas ti kararua ti kanta
a mangtubay iti kinasiasinom.
Naglinged dagiti immun-una ngem sika
iti anniniwan ti rimatmo;
tinapayanaka ti bileg ni kari
tapno mariingka iti awis ti parbangon.
Dimo nadlaw a tunggal panagrimatmo
mapatibker ti anag ni panagtalek;
ngem apay nga idi asideg unayen ni namnama
naglibaska a nagpakada?
Daniw
5 a Daniw
(Naipablaak iti Abril 10, 1961 a bilang ti Bannawag.)
