Dinutokan ita (Nobiembre 3) ni Presidente Ferdinand Marcos Jr. ni Francisco Tiu Laurel kas Sekretario ti Department of Agriculture (DA), nga ibilang ti Presidente a maysa kadagiti kapatgan nga ahensia ti gobierno.
Kinuna ni Presidente Marcos a dinutokanna ni Laurel kas Sekretario ti DA ta patienna a matarusan ni Laurel dagiti parikut ken dagiti nasken nga aramiden iti tay-ak ti agrikultura, gapu iti padas daytoy iti sektor ti panagkalap.
Innayon pay ni Presidente Marcos a kasla pangallukoy iti pribado a sektor a makipagmaymaysa iti gobierno ti pannakaisaad ni Laurel a dulo ti Agrikultura, tapno marisut dagiti parikut ti sektor.
Manipud idi 1985, nagakem ni Laurel a Presidente ti Frabelle Fishing Corporation, maysa a kompania ti panagkalap nga impasdek dagiti dadakkelna idi 1966, ket maysa itan kadagiti kangrunaan a kompania ti panagkalap iti Asia-Pasipiko a rehion. Nagpaay pay ni Laurel a Direktor ti Frabelle Corporation manipud idi 2010.
Manipud Kadagiti Agdama a Kameng ti Bannawag: Dios ti Agngina!
Nagsanay pay ni Laurel iti refrigeration, net manufacturing, panangtarimaan iti makina, electronics, hydraulics, food manufacturing, panagaramid ken panagtarimaan iti barko.
Iti panagbitla ni Laurel, imbatadna a ti modernisasion ti agrikultura ti tulbek iti pannakapasayaat iti biag dagiti mannalon ken mangngalap, ket idatagna kadagiti sumaruno nga al-aldaw dagiti planona kas daulo ti DA.
Innayon pay ni Laurel a silulukat ti opisinana kadagiti amin a mannalon ken mangngalap.(Betheena Unite/Manila Bulletin//Lito Hilidon/Bannawag.)
