Simmangbay iti Ninoy Aquino International Airport Terminal 3 dagiti 16 nga OFW manipud iti Israel idi Oktubre 16, 2023. Nagsarita da Embahador ti Filipinas iti Israel Pedro "Junie" Laylo Jr. ken President Isaac Herzog itay Nobiembre 2 tapno makaruaren dagiti 115 a Filipino a nalakon iti Gaza. (Ladawan: Pammadayaw ti pna.gov.ph.)

Kiniddaw ti Department of Foreign Affairs (DFA) iti Israel a palubosanda koman a makaruar dagiti Filipino iti Gaza iti kabiitan a panawen.

Kinuna ni Teresita Daza, pannakangiwat ti DFA, nga ipangpangrunada ti kinatalged ken pannakasalaknib dagiti Filipino nga adda iti Middle East.

Kalpasan ti pakaammo itay Nobiembre 1 a limitado pay laeng ti bilang ti mapalubosan a rummuar iti Gaza babaen iti beddeng ti Rafa, sinuratan ni DFA Secretary Enrique Manalo da Israeli Foreign Minister Eli Cohen ken Egypt Foreign Minister Shoukry tapno palubosanda metten ti natalged a panaglasat dagiti 115 a Filipino.

Segun ken ni DFA Undersecretary for Migrant Workers Affairs Eduardo de Vega, mapalubosan amin a ganggannaet a rummuar iti Gaza, ngem saan a maakomodar ti Rafah Border ti mamimpinsan nga iruruar ti 7,000 a ganggannaet, isu a 500 a tao laeng ti palubosanda a rummuar iti Gaza iti tunggal aldaw.

Eksklusibo iti Website
TURISMO: Intayon Idiay Ayuyang Garden iti Pila, Siudad ti Laoag!

TURISMO: Intayon Idiay Ayuyang Garden iti Pila, Siudad ti Laoag!

Kinuna pay ni de Vega nga ipakpakaasida a mairamanen dagiti Filipino a makaruar, idinto a naiteddan ti nagan dagitoy iti Israel ken Egypt.

Itay Nobiembre 2, kinompirmar ti DFA a 2 a Filipino a doktor ti nakaruaren iti Gaza a nagballasiw iti beddeng ti Rafah - ti kakaisuna a pagruaran manipud iti Gaza. (Betheena Unite/Manila Bulletin//Lito Hilidon/Bannawag.)