Nayawiden iti Filipinas ti bangkay ni Angelyn Peralta Aguirre, 32, ti Overseas Filipino Worker (OFW) a nairaman a natay iti panagranget ti Israel ken Hamas.
Sinabet da Department of Migrant Workers (DMW) officer-in-charge Undersecretary Hans Leo Cacdac ken Overseas Workers Welfare Administrator (OWWA) Arnell Ignacio ti bangkay ni Aguirre iti Ninoy Aquino International Airport (NAIA) itay Nobiembre 3, sakbay a naala ti pamiliana iti PAIR-PAGS Compound ti Manila International Airport Authority (MIAA).
Nairaman a napapatay ni Aguirre a caregiver iti Israel gapu iti panagtalinaedna iti sibay ti baket nga aywanna a pinapatay dagiti grupo a Hamas idi Oktubre 7.
Imbilang ti Israel ni Aguirre a bannuar gapu ta dina pinanawan ti aywanna a baket nga Israelita nupay nagpeggaden ti biagda.
Manipud Kadagiti Agdama a Kameng ti Bannawag: Dios ti Agngina!
Kinuna ti DMW ken OWWA nga agtultuloy latta ti ipaayda a tulong iti pamilia ni Aguirre.
Segun iti DMW, namnamaenda a sumangpet ti 23 nga OFW iti Filipinas inton Nobiembre 6, idinto a 27 ti sumangpet inton Nobiembre 7.
Naipasngay ni Aguirre iti Quezon City ngem ti probinsia ti Pangasinan ti puonna. (Ariel Fernandez/Manila Bulletin//Lito Hilidon/Bannawag.)
