Patien ni Japanese Prime Minister (PM) Fumio Kishida nga addan iti "nabalitokan a panawen" (golden age) ti relasion ti Filipinas ken Japan, ket kayatna a parangenen pay ti panagtinnulong dagiti dua a pagilian.
Iti State Banquet a naangay iti Malakanyang itay Nobiembre 3, kinuna ni Kishida nga addan iti kapintasan a kasasaad ti relasion ti Filipinas ken Japan nga inawaganna iti "nabalitokan a panawen," ket namnamaenna ti pannakikadua ni Presidente Marcos iti naun-uneg a panagsinninged dagiti dua a pagilian.
Nairaman iti State Banquet da bise presidente ken Education Secretary Sara Duterte, Senate President Juan Miguel Zubiri, House Speaker Martin Romualdez, Interior Secretary Benjamin Abalos Jr., Agriculture Secretary Francisco Tiu Laurel Jr., ken ni Armed Forces Chief of Staff Romeo Brawner Jr.
Nagyaman ni Kishida iti panangsangaili ni Presidente Marcos kadakuada, nupay inggunamgunamna a saan laeng a ti relasion ti Filipinas ken Japan ti dinakamatda no di pay ket maipapan iti sangalubongan a pakaseknan.
Manipud Kadagiti Agdama a Kameng ti Bannawag: Dios ti Agngina!
Mapan iti Tokyo ni Presidente Marcos inton umay a bulan para iti Association of Southeast Asian Nations (ASEAN)-Japan Commemorative Summit. (Raymund Antonio/Manila Bulletin//Lito Hilidon/Bannawag.)
