Saan pay ita a mabalin a maipababa iti PhP20 ti tunggal kilo ti bagas kas inkari ni Presidente Ferdinand "Bongbong" Marcos Jr. idi panagkakampania.
Daytoy ti imbatad ni Francisco "Kiko" Tiu Laurel iti umuna nga aldawna kas Sekretario ti Department of Agriculture (DA) ita (Nobiembre 6).
Kinuna ni Laurel nga arapaapda ti panagbalin a PhP20 tunggal kilo ti bagas, nupay 15 a tawenen a nangina ti bagas iti sangalubongan a merkado.
Nupay kasta, innayon ni Laurel nga imbilin ti Presidente a mapagbalin a moderno ti agrikultura, kas iti pannakapaadda ti umdas a padanum, pannakaaramat ti umno a bin-i a pagay, panagusar iti makina, ken dadduma pay a mainaig iti modernisasion ti panagtalon.
TURISMO: Intayon Idiay Ayuyang Garden iti Pila, Siudad ti Laoag!
Segun iti panangwanawan ti DA iti presio ti bagas iti Metro Manila, ti Local Regular Milled a PhP42 tunggal kilo ti kalakaan; idinto a PhP65 (Local Special) tunggal kilo ti kanginaan.
Kinuna ni Laurel nga ar-aramidendan ti pamuspusan tapno nalaklaka ti presio ti bagas para iti kaaduan.
Inaklon pay ni Laurel a saan a nalaka nga ipatungpal ti panggep ti Presidente a pagbalinen a moderno ti agrikultura ti Filipinas. (Jel Santos/Manila Bulletin//Lito Hilidon/Bannawag.)
