Maingaton ti sueldo dagiti empleado iti pribado a sektor ken katulongan iti Rehion 1 (Ilocos) mangrugi ita, Nobiembre 6.
Idi Oktubre 22, inanamongan dagiti kameng ti Regional Tripartite Wages and Productivity Board-1 (RTWPB-1) nga ingatoda ti sueldo dagiti agtrabtrabaho wenno empleado iti pribado a sektor iti entero a Rehion 1 a buklen ti Ilocos Norte, Ilocos Sur, La Union, ken Pangasinan.
Babaen ti Wage Order RB 1-22 nga inaprobaran ti RTWPB-1, ngumato manipud iti PhP30 inggana iti PhP35 ti kababaan a sueldo iti rehion.
Para kadagiti agtrabtrabaho iti non-agricultural establishment nga addaan iti 10 wenno nasursurok pay nga empleado, agbalinen a PhP435 ti sueldoda; idinto a PhP402 ti sueldo dagiti agtrabtrabaho iti non-agricultural establishment nga addaan iti basbassit ngem 10 nga empleado.
TURISMO: Intayon Idiay Ayuyang Garden iti Pila, Siudad ti Laoag!
Inaprobaran pay ti RTWPB-1 ti Wage Order No. RB 1-DW-04 a mangipaay iti PhP500 a nayon iti binulan a sueldo dagiti katulongan, agtalinaed man iti balay wenno saan. Ngarud, manipud iti PhP5,000 agbalinen a PhP5,500 ti sueldo ti katulongan iti Rehion 1.
Kas sagudayen ti Republic Act (RA) No. 6727 wenno ti Wage Rationalization Act, adal-adalen ti RTWPB-1 dagiti sueldo ken mangiwayat iti panagsukisok tapno maammuanda ti umisu a kababaan a sueldo iti rehion. (Freddie Lazaro/Manila Buletin//Lito Hilidon/Bannawag.)
