Salaysay ni MARIO T. TEJADA
Diak man ammo no kaano ken kasano ti sipudna. Basta idi adda puotkon, paseten ti pagtaenganmi ti Bannawag. Dikayo ngata mamati ngem saanak pay a nag-Grade One, agbasbasbasaakon iti Bannawag. Kasano dayta, kunayo ngata.
Idi ubingak, saan pay nga uso ti kindergarten ditoy ilimi a Piddig. Adda ketdi idi pribado a mangisursuro iti aw-awaganda iti kartilia. Ni Maestra Mediong a taga-Poblasion. Ditoy nga agsursuro nga agbasa ken agsurat dagiti annak dagiti adda mabalbalinna sakbay a sumrekda nga agbasa iti elementaria.
Saanak a simrek nga agadal iti kartilia ken ni Maestra Mediong ta saanak met a "rich kid." Ni Tatang ketdi ti immuna a maestrok. Innem siguro ti tawenko idi rugiannak nga isuro ni Tatang nga agbasa ken agsurat. Pangisaganana met kaniak siguro a sumrek iti eskuela. Pito ti tawen ti mabalin a sumrek iti eskuela idi. No agduadua ti maestra iti tawenmo gapu ta di intugot ti tatang wenno nanangmo ti papel ti nakairehistruam wenno nagbuniagam idi impalistanaka, bilinennaka ni maestra nga iparabawmo ti kanawan nga imam iti ulom sa gaw-atem ti akinkanigid a lapayagmo. No magaw-atmo, mabalinmon ti sumrek nga ag-Grade One.
Iti ababa a pannarita, ammokon ti agbasa sakbay a simrekak iti Grade One. Ken agbasbasaakon iti Bannawag ta linawas a mangisangpet ni Nanang no agudong. Mabalin a kunaen a ti Bannawag ti nagsursuruak nga agbasa. Kinapudnona, agbasbasaak pay idin iti Liwayway, ngem diak magustuan ta diak maawatan ti Tagalog. Basaek laeng sagpaminsan ti Liwayway a pagpraktisan nga agbasa.
Manipud Kadagiti Agdama a Kameng ti Bannawag: Dios ti Agngina!
Dakkel ti naitulong ti panagbasbasak iti Bannawag iti pannakaisaganak nga agbasa iti elementaria. Adda tiempo idi Grade One-kami a napaayabankami a saggaysa iti opisina ti prinsipal. Diak malagipen no asideg idin ti panagserra ti klase. Mabutbutengak idi sumrekak iti siled ti prinsipal ta panglukmegen a baket daytoy ken kasla naunget dagiti paningkiten a matana. Sa ketdi ti ammok idi, sa la "mayopis” ti maysa a pupil no nakabasol. Ngem nagkulpa ti gitebgiteb ti barukongko idi yawat kaniak ti prinsipal ti nakaukrad a libro. Pagbasaennak gayam!
Siempre, Ilokano ti linaon ti pabasana a panid ta Ilokano pay la idi ti lengguahe iti panagisuro iti maikamaysa ken maikadua a tukad ti elementaria. Ania pay, tinarastaskon, a, ti nagbasa. Ket no sakbay pay a simrekak iti Grade One, basbasaekon dagiti nobela a Singin iti Sinukuan kada Ti Pagbutbutngan iti Sierra Madre iti Bannawag! Daytanto la ketdin sangapanid lang nga istoria iti likud ti libro a… Ania ngaminen ti paulo daydi a libro ti Grade One a no basaem ket kaslaka la agkankanta? “A, e, i, o, u / ba, be, bi, bo, bu…Ti bao. Ti bao a babai…”
“Nalaingka nga agbasa,” inyisem ti prinsipal idi malpasak nga agbasa. Saan met gayam a naunget!
Manipud iti Grade 1 Section B naipromotak iti Grade Two Section A iti sumaruno a tawen. Ania pay ngarud ket nalaingak met ngamin nga agbasa gapu iti panagprakpraktisko nga agbasa iti Bannawag! --O
