Naitantan manen itay Lunes (Nobiembre 6) ti manamnama a panagballasiw dagiti Filipino iti beddeng ti Gaza a mapan iti Egypt gapu iti agtultuloy a panangraut ti Hamas iti Israel.
Kinuna ni Department of Foreign Affairs (DFA) Undersecretary Eduardo Jose de Vega a 20 a Filipino koma ti pumanaw iti Gaza itay Lunes ngem naiserra manen ti pagballasiwan a Rafa iti tengnga ti Gaza ken Egypt, ngem saan nga ammo dagiti opisial ti gobierno no kaano a maluktan manen daytoy.
Innayon ni de Vega nga agsasaritan ti gobierno dagiti maseknan a pagilian tapno maluktan manen ti beddeng.
Itay Lunes, kinuna ni de Vega a rumasrasay ti bilang dagiti Filipino a kayatdan ti pumanaw iti Gaza gapu ta saan a mapalubosan a rummuar dagiti kaingungotda a Palestina.
TURISMO: Intayon Idiay Ayuyang Garden iti Pila, Siudad ti Laoag!
Manipud iti 115, nagbalin laengen a 46 kadagiti 134 a Filipino ti kayatdan ti makaawid, idinto a sisasagana a pumanaw dagitoy apaman a mapakaammuanda.
Imbatad pay ni de Vega a mayun-una dagiti Filipino a rummuar inton aglukat manen ti beddeng.
Dua a Filipino a doktor a kameng ti grupo a Doctors Without Borders ti nakaballasiwen iti Egypt kalpasan ti panaglukat idi ti beddeng ti Rafah. (Joseph Pedrajas/Manila Bulletin//Lito Hilidon/Bannawag.)
