Agdagup iti 46 a Filipino ti manamnama a makaruaren iti Gaza gapu iti panaglukat manen ti beddeng ti Rafah a nagtengngaan ti Gaza ken Egypt itay Martes (Nobiembre 7), segun iti Department of Foreign Affairs (DFA).
Iti las-ud ti 3 nga aldaw, awan ti napalubosan a bumallasiw iti Rafah gapu ta saan a natalged ti situasion iti lugar. Namindua a naitantan ti panaglukat ti beddeng ti Rafah gapu iti panangraut ti Israel iti maysa nga ambulansia iti Gaza, ken panangraut ti Hamas iti Israel.
Itay Martes, impakaammo ni DFA Undersecretary Eduardo de Vega a napalubosanen dagiti 46 a Filipino a bumallasiw, ket manamnama nga addadan iti Egypt iti Martes ti rabii.
Ngem kinuna ni de Vega a 39 laeng ti sigurado a bumallasiw, idinto nga agduadua pay laeng dagiti 7.
Manipud Kadagiti Agdama a Kameng ti Bannawag: Dios ti Agngina!
Segun ken ni de Vega, kinompirmar ti Israeli Ministry of Foreign Affairs iti Embahada ti Filipinas iti Tel Aviv a mapalubosan met a rummuar iti Gaza dagiti Palestine nga assawa dagiti Filipino ket ur-urayen ita ti DFA ti naisurat a pammalubos.
Agdagup iti 42 dagiti Filipino a napaawid gapu iti pananggubat ti Israel iti Gaza. (Joseph Pedrajas/Manila Bulletin//Lito Hilidon/Bannawag.)
