Sarungkaran ni Presidente Ferdinand "Bongbong" Marcos Jr. ti Indo-Pacific Command iti Honolulu, Hawaii inton mapan daytoy iti Estados Unidos.
Imbatad ni Department of Foreign Affairs (DFA) Undersecretary Charles Jose itay Nobiembre 7 nga inawaten ni PBBM ti awis a sarungkaranna ti Indo-Pacific Command inton umay a lawas.
Kaduanto ti Presidente ti sibubukel nga opisial a delegasionna a mapan iti Honolulu.
Kinuna ni Jose a ti isasarungkar ni PBBM iti US Indo-Pacific Command ti mangpalagda iti relasion iti pagilian a kumanunong iti ilunglungalong ti Filipinas a maibasar-linteg a kinaurnos, idinto a kondenaren ti Filipinas ti panangbangen ti barko ti China iti barko ti Philippine Navy (PN) iti West Philipine Sea (WPS).
Mannurat ti Bannawag Clotilde C. Alzate, rinambakanna ti maika-100 a panagkasangayna
Malaksid iti panangsarungkar iti US Indo-Pacific Command, kasarita pay ni Presidente Marcos dagiti kameng ti Daniel K. Inouye Asia-Pacific Center for Security Studies, ngem saan a nadakamat no nairaman ti maipapan iti kasasaad iti Indo-Pacific ken WPS kadagiti pagsasaritaanda.
Itay Nobiembre 2, impetteng ti Filipinas babaen ti DFA, a ti China, saan ket a ti Filipinas, ti ilegal a sumsumrek iti baybay ti Filipinas ket nainkalintegan ti operasion ti PN iti Bajo de Masinloc.(Betheena Unite/Manila Bulletin//Lito Hilidon/Bannawag.)
