Salaysay ni LORENZO GARCIA TABIN SR.

“ALLON ti Biag” ti paulo daydi daniwko nga immuna a nagparang iti panid ti Bannawag idi Disiembre 10, 1962. No kasano ti kadakkel ti kaipapananna iti biagko, sumangkadakkel pay ti nagbalin nga akem daydi Apo Juan S. P. Hidalgo Jr., a nasingsinged nga awaganmi iti Manong Jun, nga idi agangay, inawaganmi a tallo kada Kompadre Prescillano N. Bermudez ken daydi Kompadre Cristino Iloreta Inay Sr., iti “Idolo.”

Kinuyognak daydi Manong Jun a napan nangsingir iti sangapulo a pisos a bayad ti nasao a daniw, sa dimmawat idiay sirkulasion iti kopia ti Bannawag nga intedna kaniak. Addada pay la idi idiay Soler St., Sta. Cruz, Manila.

“Ania ti makitam a biddut?” dinamagna.

Ania koma ti ammok ket aglaglagto ti pusok? Ti la pingaw ti N iti apeliedok ti naitudok!

Eksklusibo iti Website

TURISMO: Intayon Idiay Ayuyang Garden iti Pila, Siudad ti Laoag!

Diak impagpagarup a nagbalin a simbolo ti biagko daydi a daniw--lumned-tumpaw iti kaadu dagiti pannubok, ken ti la nakaipalpalladawak...  

Simmaruno ti saritak a “No Di Agunget ti Akin-aywan” a rimmuar iti Benneg Dagiti Agdadamo a Mannurat idi Marso 4, 1963. Nayam-ammoak kadagiti agbasbasa, a puon ti nangap-apalan kaniak daydi Sinamar (Robianes). Dina la ammo a dandani ti la naganko ti di nagusugosan iti kakasla mata ti nuang a tugot ti lapis a Mongol. Awanen ti malagipko kadagidi kaduak a nangrugi iti daydi a benneg. Sisiak sa ti napatanorna a nabati a sitatakder pay laeng agpapan ita!

Kaslaak  la nabulosan nga alsado, kinanayonkon ti nagisubmitir iti sarita. Ni Guillermo R. Andaya  (Amor idi ti panangawagmi) ti nangipasaan kaniak daydi Manong Jun, ta isu idi ti agig-iggem iti sarita. Kinanayonna met ti nagisubli kadagiti manuskritok! Maikasangapulo nga insubmitirko daydi “Ni Apong Sabel” a kakaisuna a nakalusot. Agosto 5, 1963 a bilang ti rimmuaranna.

“Napintas daytoy saritam!” kinuna ketdi ni Amor. Ket inulit-ulitko a binasa, pangpennekko no ania ti pagpintasanna!

Umis-isemak a kasla bagtit. Ha-ha, mannuratakon!

Kinanayonko ti nagpaspasiar idiay Bannawag. Kanayon  nga adda madandanonko a mannurat, kas ken ni Edilberto H. Angco. Nakitkitak pay idiay dagidi Segundo La. Foronda ken Leonardo Q. Belen. Uray dagidi beterano a Dr. Hermogenes F. Belen, Atty. Benjamin M. Pascual (mapagsinnukatko ti inisialda a P ken M iti kanagnaganna a nobelista iti Tagalog), ken Dr. Marcelino A. Foronda. Adda pay dagidi babbalasang a Feliciana Abril, Crescencia de la Rosa ken dadduma pay.

Mairana no dadduma a break time dagiti empleado. Daydi Manong Jun Hidalgo ti kanayon a mabutbotan ti bolsana ta paggugustona met ti mangawis kadagiti sangaili a mannurat. Open pay idi dagidi mannurat a sumrek-rummuar iti editorial. Saan la a mapan makimerienda ti panggepmi--rantaenmi ti ipadawatda a kopia ti Bannawag. Ay, diak gimmatgatang iti kopiak idi ta pagpagnaek la ti nagbaetan ti Soler St. ken Evangelista St.!

Ket wen, a! Arigna pinagbagasak ti Bannawag, ta idi naammuak a mabalin a singiren ti bayad ti sinurat uray di pay rimrimmuar, yarasaaskon no mabalin nga agsingirak. Uray sa met no di koma mabalin nga ipablaak, ritubarendan ket balbalinendan tapno matulonganda ti nakakaasi a mannurat!

Ken siguro, ammon ti Bannawag ti matalekna. Isu pay ketdin ti mangted iti topiko a suraten. Inikkannak pay daydi Manong Jun iti illustration a yaramidak iti istoriana.

Idi kuan, nagarapaapak. Agsuratak met iti nobela! “Ti Imetda nga Impierno” daydi immuna. Kinuestionaran daydi Tang David Campañano ti ispeling ti nagan ti karakter a Pupoy--Popoy kano koma. Nagbalin a trilohiana dagidi “Ramut ti Sinamar” ken “Agus.” Heavy drama dagidi. Daydi “Impierno…” ti nangiturong kaniak iti Paraiso, ta dinakon pinalusposan daydi Sinamar (Uy, pasensiakan, ‘Ma, uray ta agpayso met!) Ti Bannawag ti immuna a nangpakasar kadakami. Mabasayonto ti pakabuklanna.

Idi kuan, napaliiwko a magustuan dagiti agbasbasa ti makapakatawa nga istoria.

“Mabalin nga agsuratak iti humorous, manong?” dinamagko iti daydi Manong Jun. Isu ti kasingedko unay nga as-asitgan idi.

Nagutad ti panangtaliawna kaniak.

“Kabaelam?” Medio immulagatna.

“Padasek,” kinunak. Iti panunotko, no kabaelanda, kabaelak met! Ket adda pay la makalaglagip iti daydi nagdamdamuak a “Pakpakawan, Berde!” Kunam pay, simmarunon ti “Virginia,” “San Sandi Morning,” “Agpadigoka Man, Kabagis,” ken dadduma pay.

Ama, ket wen, a! Ad-adun ti pinayadbansko ti bayadna. Kinapudnona, bayad ti maysa a nobelak ti pinagkasarmi iti simbaan iti daydi Sinamar.

Adu ti nailista iti bibliography dagiti sinuratko. Naipangruna ti 15 a nobela, diak mabilang a sarita ken salaysay ken dandaniw. Ken naawat a pammadayaw.

“Nagal-alaam ti sinursuratmon?” Nasdaaw daydi Teresito Gabriel Tugade iti kaadu ti gapuanak, idi makitana ti bibliography nga intugotko idi nagatendarkami idiay Hawaii iti miting ti Timpuyog dagiti Mannurat nga Ilokano (TMI)-Global ken Nakem Conference. 2006 idi. Ket no pinagbagasak ngarud ti Bannawag! Kasta ngamin ti kuna kadakami ni Ed Angco idi um-umay idiay Coromina St. a yan ti kaserami idi.

Isu a no kunak a diak masubsubadan ti kinaimbag ti Bannawag kaniak, saanak nga agang-angaw!

Adu ti naitulongna kaniak, ken iti pamiliak.

Kabayatanna, adda sinuratko nga atiddog a “pakasaritaan” ti biagko ken ti pamiliak, ken ti Bannawag. Sumurotkayo tapno maammuanyo no kasano a pinagluposnak ti Bannawag. Masdaawkayo la ketdi a makaduktal iti adu a napaspasamak iti walo a dekada a panagdaliasat a kabulig ti allon ti biag. Padaananyo ditoy website ti Bannawag, marugian iti mabiit. --O