Imbatad ni Dr. Rontgene Solante a maysa nga eksperto iti infectious disease ken pangulo ti Philippine College of Physicians itay Nobiembre 8 a ngimmato ti kaso ti kamuras iti Filipinas.
Maibatay iti datos ti Department of Health (DOH), ngimmato ti kaso ti kamuras iti Filipinas iti dandani 300% manipud Enero agingga iti Oktubre 2023.
Kinuna ni Solante a maigapu daytoy iti nababa a bilang dagiti ubbing a nabakunaan iti kontra Measles, Mumps, and Rubella (MMR) iti napalabas a tawen, idinto a saan a nagteng ti 90% a kasapulan tapno malapdan ti panagraira daytoy.
Kinuna pay ni Solante a gapu ta ad-adda a naikkan ti atension ti bakuna kontra iti Covid-19, nabaybay-an ti bakuna a para kadagiti ubbing.
Manipud Kadagiti Agdama a Kameng ti Bannawag: Dios ti Agngina!
Tapno mataming daytoy a parikut, inwayat ti DOH ti programa a "catch-up vaccination" a mangipaay iti bakuna para iti MMR kadagiti ubbing nga awan pay dua ti tawenda.
Inlawlawag ni Solante a napateg ti bakuna idinto a napeggad ti kamuras, nangruna kadagiti ubbing, ken nalaka a mayakar kadagiti kabbalay ken karruba.
Innayon ni Solante nga adda komplikasion ti kamuras kas iti encephalitis ken pulmonia. (Zekinah Elize Espina/Manila Bulletin//Lito Hilidon/Bannawag.)
