Rinugianen a tingitingen ti Senado ti House Bill (HB) 8980 wenno ti 2024 General Appropriations Act (GAA) nga idauluan ni Senador Sonny Angara kas pangulo ti Committee on Finance (CoF).
Naglaon ti 2024 GAA iti detalyado a pakailatangan ti singasing a badiet nga aggatad iti PhP5.768-trilion a gastusen ti gobierno inton umay a tawen.
Manamnama a maaprobaran inton Nobiembre 27, ket kalpasanna, ummongento ti CoF dagiti katupagda iti Kamara tapno marisut ti ania man a pagdumaan iti bersion ti GAA inton Nobiembre 29, ken mairuar ti napirmaan a committee report inton Disiembre 6.
Iti biang ti Kamara, kinuna dagiti diputado a kusto ti desisionda a ma-realign dagiti confidential fund nga aggatad iti PhP1.23-bilion dagiti ahensia ti gobierno, idinto a maitunos daytoy iti kaudian a surbey ti OCTA Research nga anamongan ti kaaduan (mayoria) dagiti Filipino ti panaka-realign ti confidential fund kadagiti security agency.
Manipud Kadagiti Agdama a Kameng ti Bannawag: Dios ti Agngina!
Kinablaawan ni Ako Bicol Party-list Rep. Zaldy Co dagiti kameng ti Senado iti pannakitinnunosda a maikkaten ti confidential fund ken intelligence fund dagiti sibilian nga ahensia ti gobierno.
Kinuna ni Co nga awan ti mailatang a confidential fund iti Office of the Vice President (OVP), Department of Education (DepEd), Department of Agriculture (DA), Department of Information and Communications Technology (DICT), ken ti Department of Foreign Affairs (DFA).
Imbatad ni CO a PhP1.23-bilion a gatad ti confidential fund ti pagbibingayan dagitoy a security agency: PhP300-milion ti mapan iti National Intelligence Coordinating Agency (NICA); PhP100-milion iti National Security Council (NSC); PhP200-milion ti mapan iti Philippine Coast Guard (PCG); ken PhP381.3-milion ti mailatang iti Department of Transportation (DoTr) para iti pannakapasayaat ti Pag-asa Island Airport. (Wilnard Bacelonia/PNA//Lito Hilidon/Bannawag.)
