Salaysay ni ABRAHAM C. AGUINO JR.
Inkakaubingak ti agbasbasa iti Bannawag, a nakatukayan ti ayatko iti Literatura Ilokana. Nupay serserrekko pay la idi iti pagadalan, nasapa a rimmusing kaniak ni ayat. Ket ti Bannawag ti makuna nga umuna nga ayatko. ray mangrugrugiak pay laeng nga agsursuro nga agbasa idi, aguk-ukagakon iti Bannawag ket daytoy ti kunaek a nakasursuruak nga agbasa a natarus.
Ti Farmacia Flores, a kaarrubami laeng, ti maysa kadagiti kaunaan a paglakuan ti Bannawag ditoy nanumo nga ilimi a Bangui, Ilocos Norte. Kadagidi a panawen, dekada 80s, nupay adu met ti makabael a gumatang iti Bannawag, uso ti agupa wenno agarkila iti Bannawag. Malagipko la unay a sigagagarkami nga agkakabsat a mangpaspasungad iti Bannawag ket agiinnunakami kadagiti manangek a da Agnes ken Precy a mapan agarkila apaman a sumangpet daytoy. Adda pagtugawan a naisangrat kadagiti agarkila nga agbasa. Binting ti pagarkila.
Saan pay a nakadanon idi ti koriente iti ilimi isu nga awan ti telebision ket no saan a transistor radio, umanay a liwliwan dagiti kailianmi ti agbasa iti Bannawag. Diak man ammo no apay a ti kaarrubami a parmasia ti nagbalin nga outlet ti Bannawag kadayta a tiempo. Mabalin nga isuda ti maysa kadagiti makunkuna nga ahente ti magasin idi. Malagipko a ti immuna a napadayawan a mannurat iti Bangui a ni Jose Flores, nagindeg iti mismo a ligason a timmakderan ti Farmacia Flores.
Kadagidi a panawen a naam-ammok met dagiti dadakkel a nagnagan dagiti mannurat nga Ilokano a kas kada Apo Greg Laconsay, Reynaldo Duque ken dadduma pay.
TI BANNAWAG KEN SIAK (40): Ti Bannawag, ni Sherma, ken Siak
Diak met malipatan ni Apo Dionisio Bulong ken ti paboritok a karakterna a ni Macario iti nobelana a “Fighting Pogi.” Ket nalaus man ti ragsakko a nakaam-ammo kenkuana iti naudi a Dap-ayan ti GUMIL Filipinas a naangay iti Bangui National High School, ti agdama a pagserserbianmi ken Apo Prinsipal Joel B. Manuel, a maysa met laeng a nalatak a mannurat a patanor ti probinsiami nga Ilocos Norte.
Ngem naputed daytoy a “pannakilailok” iti Bannawag iti ipapanawko iti ilimi idi napanak nagbasa sa kalpasanna, nagobraak iti ballasiw-taaw. Ngem kas kunadan, saanto pulos a matay ti umuna nga ayat ta kalpasan ti dandani tallopulo a tawen nga innak pannakaipusing, nagungar ti ayatko iti Bannawag saan laengen a kas agbasbasa ngem itan pinadasko metten ti agsurat. Dakkel nga utang ken yamanko daytoy iti agdama nga editor ken kaprobinsiaak a ni Sir Cles Rambaud a nangidurduron kaniak nga agsurat.
Naipablaak ti umuna a daniwko iti Bannawag idi 2009 a sinaruno ti salaysayko maipapan ken ni Miss Ilocos Norte 2021 Lyza Katrina Samalio, a nasuratko idi kapades ti pandemia.
Dakkel a yamanko iti Dios a Namarsua a nangitunda kaniak tapno subliak daytoy a pannakitaktakunaynayko iti ipatpategtayo unay a Bannawag.
Ita, adda kabarbaro nga outlet ti Bannawag iti Bangui, maysa met laeng a parmasia, ti Nyshan Pharmacy, a masarakan iti sango ti Bangui District Hospital. Agtultuloy ngarud nga itandudo ken sappuyotentayo ti magasintayo. Kaniak, agtultuloy ti panagayatko ta pudno, saan a matay ti umuna nga ayat. Agbibiag latta. Agbiag ti Bannawag! --O
