Iti maysa a pakdaar itay Nobiembre 9, binallaagan ti Department of Health (DOH) ti publiko maipapan iti peke a Facebook page nga agnagan ti "DOH Hotnews."
Kinuna ti DOH a peke ti "DOH Hotnews" a mangus-usar iti nagan ken logo ti DOH, idinto nga awan pakainaigan daytoy iti ahensia, ken al-allilawenda ti publiko kadagiti ulbod nga impormasion.
Inyunay-unay ti DOH iti publiko a mapan ketdi iti opisial a website ti DOH ken ti social media account daytoy iti Facebook ken Twitter babaen ti DOHgovph ken www.doh.ph tapno natalged ken napudno ti mabasa a paskil, pakaammo, ken dadduma pay nga impormasion.
Paset daytoy a pakdaar iti tarigagay ti DOH a mangparmek iti ulbod nga impormasion ken masierto a kusto ken mapagtalkan ti impormasion a maala ti publiko maipapan iti salunat. (Zekinah Elize Espina/Manila Bulletin//Lito Hilidon/Bannawag.)
