Insayangkat ti Public Attorney's Office (PAO) itay nabiit ti legal a konsultasion para iti 17 a persons deprived of liberty (PDL) iti Bureau of Jail Management and Penology (BJMP) District Jail ti Santa Teresita, Cagayan.
Iti panangidaulo ni Presiding Judge Neljoe Cortes ti Regional Trial Court Branch 6 iti Aparri, Cagayan ken dagiti staff ti PAO ti Aparri ken Gonzaga, naiwayat ti konsultasion kas panangselebrar iti National Correctional Conciousness Week 2023 idi Oktubre 22-28.
Babaen ti panangiwanwan ni OIC District Jail Warden SJO3 Florante S. Delos Santos, inadal ken rinepaso ti grupo ti PAO ti kaso dagiti 17 a PDL ken naipaayan iti pammagbaga ken pammalakad tapno mapatibker ti pakinakem dagitoy para iti panagbalbaliw ken panagsingsingpetda iti pagbaludan. (Edison B. Tobias)
