Pinalagipan ti Department of Labor and Employment (DOLE) dagiti pribado a kompania nga ipaayda ti 13th-month pay dagiti empleadoda iti saan a naladladaw ngem Disiembre 24.
Iti Labor Advisory 25 s2023 nga impaulog ni DOLE Secretary Bienvenido Laguesma itay Nobiembre 8, inyunay-unayna ti tinawen a pagalagadan iti umno a panagkuenta iti benepisio dagiti empleado iti pribado a kompania.
Obligado dagiti kompania a mangted iti 13th-month pay kadagiti empleadoda a nagtrabahon iti di nababbaba ngem iti 1 bulan, kas sagudayen ti Labor Code of the Philippines ken Presidential Decree 851.
Maikkan met iti 13th-month pay dagiti gagangay nga empleado a mabaybayadan babaen ti nagapuananda (piece-rate basis), naikeddeng, wenno garantisado a sueldo ken komision; dagiti addaan iti adu nga amo; naglusulos; naikkat iti trabaho; wenno dagiti naka-maternity leave ken nakaawat iti salary differential.
Manipud Kadagiti Agdama a Kameng ti Bannawag: Dios ti Agngina!
Para kadagiti saludsod maipapan iti 13th-month pay, umawag iti Hotline ti DOLE a 1349 a silulukat iti aniaman nga oras; mabalin ti umawag wenno ag-text iti 09310662573 manipud Lunes agingga iti Biernes, manipud 8:00 a.m. agingga 5:00 p.m.. Mabalin met ti ag-email iti [email protected] wenno agipatulod iti mensahe iti Facebook Page ti DOLE. (Ferdinand Patinio/PNA//Lito Hilidon/Bannawag.)
