Salaysay ni MINERVA CORPUZ BUTAC ORTEZA
ADDAAK iti elementaria idi damok ti makakita iti Bannawag. Daydi apongko a Minang ti makitkitak a kanayon nga agbasbasa iti daytoy a magasin, malaksid pay iti lunario a damo a nakakitaak iti naimaldit a pagsasao nga Ilokano. Kadagidi a panawen, di pay nadanon ti linia ti koriente ti barangaymi iti Allacapan, Cagayan ket panagdengngeg iti drama iti transistor radio ken panagbasa iti Bannawag ti napuotak a pagliwliwaan ti tattao.
Ti "Gasatyo Ita a Lawas" ti maysa a padpadaanak idi ta sisiimek no pumudno dagiti nailanad. Kasta met dagiti komiks. Ngem no dadduma, malibtawak ti makaukag iti Bannawag idi. Idi agbayag, nagustuak metten dagiti maipabpablaak a daniw ket dagitoyen ti un-unaek a basaen. Idi kuan, kayatko metten a makaipablaakak koma met iti Bannawag. Ngem arapaap dayta a diak ammo no matungpal.
Ti "Anglem" ti diak malipatan a daniw iti Bannawag (diak malagipen no asino ti autorna ken no ania a tawen a naipablaak daytoy nupay mabalin a 1990s pay). Naidumduma man a daniw, kunkunak idi. Ta tunggal balikas a basaek ket kasla addada a mayapit iti imahinasionko; ti masaysay-up nga asuk ti anglem kabayatan ti pannakaipasngay ti maysa a maladaga. Nupay diak maawatan idi damo no ania ti "anglem," naammuak ken naawatak met laeng ta sinaludsodko kadaydi nanangko.
Agingga a pinadpadasko metten ti agsuratsurat iti walo a linia nga agpapada ti rima ti ngudo ti tunggal linia. Impakitak ken ni tatangko. Ngem kinunana a narabaw ti Ilokanok ken nababa laeng ti sinuratko a patiek a daniw. Namaymayat koma kano no kas kadagiti daniw a maibasbasa iti radio wenno maipabpablaak iti Bannawag.
TI BANNAWAG KEN SIAK (40): Ti Bannawag, ni Sherma, ken Siak
Uray ni ulitegko a Gimmo a maysa idi a nataengan a baro, kanayonko a makita iti paradaan iti ilimi nga agbasbasa iti Bannawag, idi addaakon iti hayskul. Sangarantaan ti agpaili ken maysa laeng ti lugan nga agpapan ken agawid. Iti aldaw ti Huebes a panagdadapon laeng idi nga adda lako a Bannawag. Ket rantaek idi, no kasta a makaawidkami tunggal Sabado, ti mapan iti balay da ulitegko iti aw-awaganmi iti “poro” wenno iti tengnga ti kataltalonan tapno innak la makibasa iti Bannawag.
Idi addaak iti maudi a tukad ti hayskul, ni Ma'am Leonora Urata, adviser ti klasemi, idi maammuanna a naayatak nga agbasa iti Bannawag,ti agipabpabulod kaniak iti adu a kopia ti Bannawag. Isu pay ti nangkarit kaniak iti kabaelak iti panagsurat. Feature writing iti Tagalog ti pinadpadasko idi ket nakapablaakak met kadagiti sinuratko iti Excelsior, ti pagiwarnak ti pagadalanmi. Pinadasko met idi ti nakisalip iti panagsurat nupay saanak a napagasatan a nangab-abak. Intultuloyko latta ketdi ti nagsursurat.
Diak man ammo no apay a dagdagullitek a basaen idi dagiti makapasangit a sarita. Bilibak kadagiti mangyal-alat iti gunggona kadagiti salip iti panagsurat. Naglaingda a mangtukay iti rikna. Ti "Ti Kari ni Floring" (ni Rosalinda R. Jamorabon) ti maysa kadagiti makapasangit a sarita a sinubliasubliak a basaen. Naipablaak daytoy iti Bannawag idi 2007.
Magustuak pay ti nobela a "Rissik ti Essem" ni Apo Prodie Gar. Padios a kaprobinsiaak (taga-Santa Teresita, Cagayan ni Apo Padios) a mannurat ken nagpaay a literary editor ti Bannawag.
Da Apo Ariel S. Tabag (a diak impagarup a makitak iti personal), Roy V. Aragon, Dionisio S. Bulong, Benjamin Pacris, Anna Liza Gaspar ti sumagmamano kadagiti diak malipatan a mannurat a nakitak idi damok ti tumabuno iti Dap-ayan ti GUMIL Filipinas idi 2018 (iti Sta. Ana, Cagayan). Ni Apo Provincial Board Member Vilmer V. Viloria (a nagpaspasalip idi iti daniw iti radio ken dati a presidente ti GUMIL Filipinas) ken kadagiti mannurat iti Cagayan ti nangiturong kaniak iti umuna a pannakidap-ayko iti GUMIL.
Idi mauso ti Facebook, pinadpadasko latta met ti nagabel kadagiti balikas. Nagkamengak kadagiti grupo dagiti agdandaniw ken mannurat nga Ilokano iti social media. In-inut a nasurotak ti desdes dagiti mannurat a mabasbasak laeng idi iti Bannawag. Kadagiti grupo a nakipagadalak, naam-ammok da Apo Joel Manuel, a nakaadawak iti Ilokano Linguistic 101 ken nangilaem kaniak iti Sarigilap Group (grupo dagiti agsursurat iti “sarita nga apaggilap” wenno ababa a sarita). Dagiti nobelista a kas Apo Jovito Amorin ken Apo Danilo Bautista (editor in-chief ti Ariwanas Magasin), a diak impagarup a makadinnakulapko ida. Kasta met da Apo Mario Tejada, Benjamin Pacris, Daniel Nesperos, Rudy Contillo a naam-ammok idi iti maysa a taripnong dagiti mannurat idiay Currimao, Ilocos Norte. Dagitoy ken dadduma pay a maibilang a “bituen” ti Literatura nga Ilokano, ti nangukod kadakami tapno maipasnekmi pay ti agsurat ken mangpasayaat iti panagsuratmi.
Tawen 2021 idi damok ti nakaipablaak iti Bannawag. Saan a matukod ti rag-ok idi iti pannakaigasat dagiti kunaek a karamukom a letrak a nai-Bannawag. Diak impagarup a mabasak met ti naganko iti kangrunaan a magasin dagiti Ilokano nga inkakaubingak a binasbasa ken inarapaap a makasuratakto koma met iti maipan kadagiti panidna. Diakto malipatan ni Apo Oswald A. Valente, a di nagsarday a mangbaybayabay kaniak. Kasta met kada Rodel Estacio ken Marlon Rodrigo, a di met nauma a mangibingbinglay latta iti ammoda iti panagsurat.
Intultuloyko ti nagsursurat ket pasaray agipatulodak latta iti Bannawag. Adda met latta maipabpablaak a dandaniwko. Immadu pay dagiti pagayamko gapu iti Bannawag. Kaaduanna dagiti padak nga agessem nga agsurat ken mangipatpateg iti Literatura nga Ilokano.
Addaak latta ditoy lugar-pagaraban ditoy ballasiw-taaw (maysaak nga OFW ditoy Malaysia) ngem diak latta nagliway nga agbasa ken agurnong iti Bannawag. Uray sadinno ti ayanko ken iti baet ti adu a pakakumikoman iti biag, agsuratak latta ken agtultuloy nga agarapaap. Ammok a matungpal ti maysa nga arapaap no nareggetka a mangragpat. Kas iti arapaapko a natungpal, gapu iti Bannawag. --O
Iti Maika-89 Nga Anibersario Ti BANNAWAG: 89 A Salaysay Para Iti Benneg A “Ti BANNAWAG Ken Siak”!
Kasapulanmi ti 89 a salaysay nga ipablaakmi iti website ti Bannawag (bannawag.ph) a kas paset ti panangrambak ti Bannawag iti maika-89 nga anibersariona. Reader-ka man, wenno agsursuratkan iti Bannawag, mabalinmo ti mangidatag iti sinuratmo itoy nga email address: [email protected]
Manipud kadagiti maipablaak iti website, pumilinto met dagiti editor iti maipablaak iti print edition ti Bannawag, iti benneg a “Ti Bannawag ken Siak,” mangrugi iti Nob. 16-30, 2023 a bilang agingga iti Nob. 1-15, 2024 a bilang.
Agatiddog ti salaysay iti 500-1,500 a balikas. Mangisapit met iti ladawan (no adda) a kadua ti salaysay.
Pakuyogan ti sinurat iti ladawan ken ababa a pakasaritaan ti biag.
Maipapan iti ania ti suratek a salaysay?
Mabalinmo ti mangsurat iti uray ania a maipanggep iti bukodmo a padas mainaig iti Bannawag, wenno mangpili iti maysa kadagitoy nga ehemplo a topiko:
- Ti/dagiti paboritok a sinurat (sarita/daniw/nobela/komiks)
- Ti/dagiti paboritok a mannurat
- Naglaklakoak met iti Bannawag
- Idi makitak dagiti idolok a mannurat ti Bannawag (ubbingda pay met la gayam, kunak no lallakaydan!)
- Dagiti lebbenko (koleksion) a Bannawag
- Ti naitulong ti Bannawag iti panagadalko iti elementaria/hayskul/kolehio
- Gapu iti Bannawag, adu ti nagtengko a luglugar (iti Filipinas ken/wenno abroad)
- Adu ti nagbalin a papagayamko gapu iti Bannawag
- Nasarakak ni forever-ko gapu iti Bannawag!
- Naital-oak/nakasarakak iti napintas a trabaho/pagtrabahuan gapu iti Bannawag
- Nakasarakak iti Bannawag iti napanak a ganggannaet a pagilian!
- Immannayas ti panagilokanok (“limmaingak nga agilokano!”) gapu iti panagbasbasak iti Bannawag
- No apay nga agbasbasaak/gumatgatangak latta iti Bannawag, agingga ita
- Ken dadduma pay.
Magatang ti Bannawag kadagiti kadagiti sukiyo nga aglaklako iti pagiwarnak ken magasin.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, 09171360110.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
