Kinuna ti Department of Foreign Affairs (DFA) idi Oktubre 17 a masapul a siguraduen ti Israel a mayannatup iti international humanitarian law dagiti ar-aramidenna a pananggubat iti Hamas, ken awan ti mairaman a sibilian. (Ladawan: Pammadayaw ti pna.gov.ph.)

Inanamongan ti Filipinas ti maysa a resolusion ti United Nations General Assembly (UNGA) a mangkonkondenar iti panagtalinaed ti Israel iti masakupan ti Palestine iti daya ti Jerusalem, ken ti kinaranggas ti Israel kadagiti Palestine a sibilian ken ubbing.

Pito a pagilian ti simmupiat iti resolusion a pakairamanan ti Israel ken Estados Unidos, a kaalyado ti Filipinas, idinto a 18 ti saan a nagbotos.

Idi Oktubre 27, sinupiat ti Filipinas ti immuna a resolusion ti UNGA a nangkiddaw iti pannakaipasardeng ti panaggubat ti Israel ken Hamas, a nangrugi gapu iti panangsakup ti Israel iti teritorio ti Palestine nga iturayan ti Hamas.

Ngem ita, kimmappon ti Filipinas kadagiti 144 a pagilian nga immanamong iti resolusion, gapu iti pangngeddeng ti UNGA Special Political and Decolonization Committee nga agkukuna a linabsing ti Israel ti kalintegan dagiti Palestine ken dadduma pay nga Arabo iti nadakamat a teritorio.

Dinakamat ti kaudian a resolusion ti pangngeddeng ti International Court of Justice (ICJ) a linabsing ti Israel ti sangalubongan a linteg gapu iti panangsakupna iti teritorio dagiti Palestine (agraman iti daya ti Jerusalem).

Eksklusibo iti Website
Mannurat ti Bannawag Clotilde C. Alzate, rinambakanna ti maika-100 a panagkasangayna

Mannurat ti Bannawag Clotilde C. Alzate, rinambakanna ti maika-100 a panagkasangayna

Imbatad pay ti resolusion ti pannakayalis dagiti umili ti Israel iti teritorio dagiti Palestine, pannakakompiskar ti daga, ti inkapilitan a panagyakar kadagiti sibilian a Palestine agraman pamilia dagiti Bedouin, ti pannakadadael iti natural a rekursos, pannakabingay ti teritorio, ken dadduma pay nga aramid a maibusor kadagiti Palestine. (Joseph Pedrajas/Manila Bulletin//Lito Hilidon/Bannawag.)